Soltústik Qazaqstan oblysynda qatty daýyl turyp, saldarynan birneshe aýdandaǵy ǵimarattarǵa zaqym keldi. Eki adam jaraqat aldy, dep habarlaidy QazAqparat.
SQO tótenshe jaǵdailar departamenti osyǵan bailanysty brifing ótkizdi. Vedomstvo bastyǵy Ramil Kamalovtyń aitýynsha, 7 sáýir kúni 7 aýdanda 24 nysannyń shatyryn julyp ketti. Jalpy aýmaǵy - 8 myń sharshy metr.
«Aiyrtaý, Timiriazev, Ǵ.Músirepov, Aqqaiyń, Taiynsha, Aqjar jáne M.Jumabaev aýdandarynda negizinen densaýlyq saqtaý, bilim berý mekemeleri men jeke turǵyn úiler daýyldan zardap shekti. Iaǵni, 6 mekteptiń, 2 densaýlyq saqtaý, 1 dúkenniń, shaǵyn biznes ókilderine tiesili 6 ákimshilik ǵimarattyń jáne 1 bidai óńdep, saqtaityn nysannyń shatyrlaryn julyp ketti», - deidi Ramil Kamalov.
Qatty daýyldan eki adam zardap shekti.
«8 sáýir Timiriazev aýdanyndaǵy Komsomolskoe eldi mekeninde ekpini sekýndyna 30 metrge jetetin jáne odan da joǵary qatty jeldiń saldaryna túngi saǵat 2.00 shamasynda dúkenniń shatyryn julyp ketken. Saldarynan eki adam jaraqat aldy. Olar - 1989 jáne 1977 jyly týǵan azamattar. Olar qazir statsionarda em alyp jatyr, jaǵdaiy birqalypty», - deidi departament basshysy.
Jergilikti atqarýshy organdarmen birge kelgen shyǵyn mólsherin anyqtaý maqsatynda arnaiy komissiia quryldy. Ǵimarattar tez arada jónge keltiriletin bolady. Birinshi kezekte aýrýhanalar men mektepter jóndeledi.
Ramil Kamalovtyń aitýynsha, zaqym kelgen ǵimarattardyń arasynda M.Jumabaev aýdanyndaǵy úsh qabatty aýrýhana da bar. Nysannyń shatyryn julyp ketken. Jalpy aýmaǵy - 600 sharshy metr. Aýrýhanada bosanatyn úsh áiel jatqan, olar zardap shekken joq.
