Soltústik Qazaqstan oblysynyń ákimi Qumar Aqsaqalov koronavirýs boiynsha óńir ahýalyn baiandady, dep habarlaidy QazAqparat.
«Sizder jańalyq qaraǵanda aimaqtaǵy jaǵdai kúrdeli degen pikir qalyptasýy múmkin. Is júzinde olai emes. Jaǵdai tolyq baqylaýda. Aimaqta qatań shekteý sharalary bir aidan beri qoldanylyp keledi. Shekara beketterinde karantin statsionarlary ornalastyryldy. PTsR-test bolmasa, elge kirýge tyiym salynǵan», - dep atap ótti ákim Ortalyq kommýnikatsiialar qyzmetinde ótken brifingte.
Oblys ortalyǵynda karantin engizildi. Demalys kúnderi «lokdaýn» rejimi ornaǵan. Poiyzdardyń sany qysqaryp, óńirdegi avtobýs marshrýttary toqtatyldy.
«Bul sharalardyń barlyǵy jaǵdaidy turaqtandyrý úshin qabyldanǵan. Kún saiyn virýs juqtyrý men aýrýhanaǵa jatý oqiǵalary azaiyp keledi. Jalpy aýyrǵandardyń 94% jazylyp shyqty. Densaýlyq saqtaý júiesine de aitarlyqtai júkteme túsken joq. Statsionardaǵy tósek-oryn qorynyń 36%-da naýqastar jatyr. Josparly aýrýhanaǵa jatqyzý jumystary toqtaǵan joq. Sondyqtan, qazirgi epidemiialyq jaǵdaiǵa súiene otyryp, jeltoqsan aiynyń ortasyna qarai demalys jáne mereke kúnderindegi lokdaýndy alýdy, oblys ortalyǵynda shekteý sharalaryn aitarlyqtai jeńildetýdi josparlap otyrmyz», - dedi Q. Aqsaqalov.
Sonymen birge, aimaqta jańa juqpaly aýrýlar aýrýhanasy salynyp, jasandy tynys alý apparattary satyp alyndy. Jedel járdem kólikterin jabdyqtaý 76 paiyzdan 100 paiyzǵa jetkizilgen.
