Úkimet otyrysynda Bilim jáne ǵylym ministri Ashat Aimaǵambetov 2025 jylǵa qarai sheteldik 5 joǵary oqý ornynyń filialyn ashý týraly Prezident tapsyrmasy qalai iske asatynyn aitty, dep habarlaidy QazAqparat.
«Biz bedeldi sheteldik ýniversitetterdiń filialdaryn ashý jumystaryn bastap kettik. Qazirgi ýaqytta elimizde «De Montfort Leicester» ýniversitetiniń filialy jumys istei bastady. Halyqaralyq úlgidegi diplom beriledi. Sondai-aq, Soltústik Qazaqstan memlekettik ýniversitetin «Arizona» ýniversitetine senimgerlik basqarýǵa berý máselesi qarastyrylýda. Qazirgi ýaqytta «Arizona» ýniversitetimen birge memorandým jasadyq», - dedi vedomstvo basshysy.
Sondai-aq, ol elimizdiń batys óńirlerinde eki sheteldik tehnikalyq ýniversitettiń filialdary ashylatynyn eske saldy.
«Sondai-aq, tehnikalyq baǵyttar boiynsha Reseidiń úzdik joǵary oqý oryndarynyń filialdaryn ashý boiynsha kelissózderdi bastap, júrgizip jatyrmyz jáne arnaiy úkimetarlyq kelisim daiyndadyq», - dedi ministr.
