Talǵardaǵy aýrýhanada uldary dárigerlerdi soqqyǵa jyqqan marqum naýqasqa qatysty tolyq málimet belgili boldy, - dep habarlaidy Tengrinews.kz saity.
Talǵar ortalyq aýdandyq aýrýhanasy málimetinshe, 64 jastaǵy er adam júrek talmasymen jetkizilgen. Onyń jaǵdaiy óte aýyr bolǵan.
"Naýqas koronarlyq patologiiaǵa jáne kardiogendi shokqa bailanysty óte aýyr jaǵdaida tústi. Esinen tanyp qalǵan, suraqtarǵa jaýap bermedi. Týystarynyń aitýynsha, aýrý belgileri ony úsh kún boiy mazalaǵan. Dárigerge júginbegen. Anginaldy aýyrsyný kúsheigennen keiin jedel járdem shaqyrǵan", - deidi aýrýhana ókilderi.
Naýqasty quramynda kezekshi terapevt, nevropatolog, reanimatolog bar kópsalaly dárigerler brigadasy qarady. Tótenshe manipýliatsiialar, ókinishke qarai, nátije bermedi.
"Anesteziologiia, reanimatsiia jáne qarqyndy terapiia bólimshesinde saǵat 04:50-de júrek soǵysy toqtap, 30 minýt boiyna reanimatsiialyq sharalar júrgizilip, saǵat 05:20-da naýqastyń biologiialyq ólimi anyqtaldy", - delingen habarlamada.
Aýrýhanadaǵylar máiitti týystaryna nege birden bermegenderin de túsindirdi.
"Aýrýhanalarda mynadai ereje bar: eger naýqas eki saǵat ishinde qaitys bolsa, biz onyń óliminiń sebebin anyqtaý úshin ony politsiia bólimine tapsyrýǵa mindettimiz. Bul týraly týystaryna habarlaǵanda, olar ashýlandy. Olar biz bir nárseni jasyrmaq dep kúdiktendi. Biraq ereje bar, zań bar. Eger naýqas alǵashqy eki saǵat ishinde qaitys bolsa, onyń sebebin anyqtaýǵa mindettimiz", - dep túsindirdi aýrýhanadaǵylar.
Aýrýhana dárigerler naýqasqa barlyq tiisti reanimatsiialyq sharalardy qabyldaǵanyna sendirdi.
"Biz olardan tańǵy 8-ge deiin bir saǵat kútýlerin suradyq. Osy ýaqytta qyzmetkerler kelip, barlyq qujattardy toltyrady. Biraq týystary jansaqtaý bóliminiń esigin buzyp, jaqynda soqyr ishekke ota jasalǵan reanimatolog-anesteziolog pen dárigerdi uryp-soǵa bastady. Sóitip, ony tigis salynǵan jerinen tepkilegen, murnyn syndyryp, miy shaiqalǵan", — deidi Talǵar ortalyq aýdandyq aýrýhanasy ókilderi.
Taiaq jegen reanimatsiialyq dáriger 27 jasta. Er adamnyń jaǵdaiy aýyr. Qazir ol jansaqtaý bóliminde jatyr.
21 jastaǵy dárigerde jabyq bassúiek-mi jaraqaty, bas miynyń kontýziiasy, sol jaqta samai aimaǵynyń jumsaq tinderiniń kontýziiasy, muryn súiekteriniń synýy diagnozy qoiylǵan.
