Qazaqstannyń tarihshylary Ekinshi dúniejúzilik soǵystyń máselelerin tyńǵylyqty zertteýi kerek. Bul týraly onlain konferentsiiada belgili saiasattanýshy Aidos Sarym málim etti, dep habarlaidy QazAqparat.
Búgin Jeńistiń 75 jyldyǵyna orai «Bilim-Innovatsiia» halyqaralyq qoǵamdyq qory jəne «edLight Education Support Center» JShS-niń uiymdastyrýymen «Urpaqqa uran bolǵan uly erlik» atty respýblikalyq ǵylymi-praktikalyq onlain konferentsiia ótti.
«Biz elimizde óz Táýelsizdigimizge qol jetkizip, óz tarihymyzdy aitatyn, jazatyn, zertteitin zamanǵan keldik. Germaniiamen soǵys birshama zerttelgen bolsa, bizdiń qazaqtardyń Keńes-Fin soǵysyna qalai qatysqany jaiynda tereń zerttelmegen. Sonymen qatar, Japoniiada qalai soǵystyq degen áńgimeler aitylmaǵan. Soǵys degenimiz - maidanǵa attanǵan azamattardyń erligi. Kezinde bizge tek jaqsy jaǵyn ǵana kórsetýge tyrysty. Negizi, osy soǵystyń qarapaiym kúnderi bar. Keibir diviziialarymyz tórt adamǵa bir myltyq berip, soǵysqa qatysqan. Talai diviziialar bir táýlikte joiylyp ketken kúnder bar», - dedi saiasattanýshy.
Osy oraida A. Sarym tarihty durys zertteý kerektigin atap ótti. Bul turǵyda soǵysta júrgen azamattar kúndelikti ómirin qalai ótkizgenin tyńǵylyqty zertteý qajet.
«Ekinshi úlken erligimiz – ol tyldaǵy azamattardyń, analarymyzdyń, ájelerimizdiń janqiiarlyq eńbegi. Soǵys jaǵdaiynda kúndelikti ómirde shyryldap otyrǵan balaǵa nanyn taýyp berý, odan keiin zaýytqa nemese qyrmanǵa baryp jumys isteý – bul da úlken erlik. Osy jaǵyn da kóp aita bermeimiz, az-maz kinolarymyz ári shyǵarmalarymyz bar. Bizde soǵys taqyryby tek sony kórgen adamdardyń ǵana ieligi bolyp qaldy. Biz nege qiialdamaimyz, biz nege oilanbaimyz?», - dedi ol.
Sonymen qatar saiasattanýshy qazir álemde «jadylar soǵysy», «tarih soǵysy» degen taqyryptar paida bolǵanyn aitty. Resei tarih taqyrybyna, onyń ishinde Ekinshi dúniejúzilik soǵys taqyrybyna airyqsha mán berip otyr.
«Jalpy, bul taqyrypta ózimizdiń jolymyzdy tabýymyz kerek siiaqty. Menińshe, 9 mamyr tek qýanysh kúni emes. Shyndap kelgende, ata-babalarymyzdy eske alyp, meshitke barý kerek. Biz bul kúndeaza tutyp, iaǵni ishtei oilanyp, soǵystyń bolmaýyn tileýimiz qajet. Osy oraida tiisti kózqarasty qalyptastyrǵan durys bolar», - dedi A. Sarym.
Onyń atap ótýinshe, aldaǵy ýaqytta soǵysta, asharshylyqta joǵalǵan adamdardy izdep tabýǵa mán berý kerek. Bul rette arhivtik jumystardy jandandyrý sharalary kútip tur.
«Biz únemi ózimizdiń jolymyzdy bilip, ózimizdiń ulttyq múddemizdi eshqashan esten shaǵarmaýymyz kerek. Shynymen de soǵysta úlken erlik te, úlken qiianat ta boldy. Ońai jeńil-jelpi tujyrymdamalarǵa berilmei, ózimizdiń úlken tujyrymmen kelip, estelikterdi jinaýǵa mán bergen jón», - dedi Aidos Sarym.
