Órlitóbe (Pavlodar oblysy) shekaralyq baqylaý-ótkizý pýnktiniń aýmaǵynda ótken resmi is-shara barysynda Qazaqstannyń Omby qalasyndaǵy Bas konsýldyǵynyń qyzmetkerleri qazaq sarbazy Embergen Asainovtyń súiegin Pavlodar oblysy ákimdiginiń ókilderine tapsyrdy. Bul týraly SIM habarlady.
Jaqyn arada sarbazdyń súiegi Qyzylorda oblysynda turatyn týystaryna jetkizilip, týǵan ólkesinde jerlenedi.
Jaýynger Embergen Asainov 1900 jyly Kyzylorda oblysynda dúniege kelgen. 1942 jyldyń aqpan aiynda Aral aýdanynan ásker qataryna shaqyrylyp, Leningrad túbindegi keskilesken qandy shaiqasta erlikpen qaza tapqan.
Keńes sarbazynyń súiekterin reseilik izdeýshiler 2019 jyldyń kúzinde Leningrad oblysy Kirov aýdynynyń mańynda tapqan. 2021 jylǵy 18 maýsymda Omby qalasynda ornalasqan áskeri dańk murajai kompleksiniń aýlasynda «Qazaq ulttyq-mádeni ortalyǵy» óńirlik qoǵamdyq birlestigi uiymdastyrǵan saltanatty miting ótti. Atalǵan is-shara barysynda Omby oblysy úkimetiniń resmi ókilderi men jergilikti ardagerler keńesi qazaq sarbazynyń súiegi salynǵan tabyt pen onyń jeke zattaryn Qazaqstannyń Bas konsýldyǵynyń ókilderine áskeri qurmetpen tapsyrdy.
Qazaq sarbazy Embergen Asainovtyń súiegin taýyp, ony týǵan elge jetkizýge qoldaý kórsetken úshin Bas konsýldyq barlyǵyna óziniń zor alǵysyn bildiredi.
