QR Syrtqy ister ministrliginiń Konsýldyq qyzmeti Siriiada qalǵan qazaqstandyq balalardy anyqtaý sharalaryn júrgizip jatyr. Olardyń ata-analary áskeri qaqtyǵystarda qaitys bolǵan, dep xabarlaidy QazAqparat tilshisi.
"Qazirgi kezde Siriiada qalǵan qazaqstandyq balalar týraly naqty málimetti eshkim bere almaidy. Ulttyq qaýipsizdik qyzmetinde de ondai derek joq. Sebebi shetelge shyǵý - Qazaqstan azamattarynyń konstitýtsiialyq quqyǵy. Olardyń qalai jáne qai memleket arqyly áskeri aimaqtarǵa baryp jatqanyn eshkim baqylap jatqan joq. Ondai azamattar konsýldyq tirkeýge turmasa, olardy elge qaitarý qiyn. Al áskeri qaqtyǵystarda qaitys bolǵan qazaqstandyqtar az emes. Olardyń balalary bosqyndar lagerlerinde qaldy. Qazirgi kezde biz sol balalardy anyqtaý boiynsha tiisti sharalardy atqaryp jatyrmyz", - dedi QR Syrtqy ister ministrligi Konsýldyq qyzmet departamentiniń direktory Ardaq Madiev Astanada ótken baspasóz máslixatynda.
Onyń aitýynsha, qazaqstandyq balalardy tabý ońai sharýa emes. Sebebi olardyń ishinde kishkentai balalar da bar.
"Olar qaidan jáne qashan kelgenin aita almaidy. Sebebi áskeri qaqtyǵystar aimaǵynda júrgenderine úsh-tórt jyl boldy. Sol jerde týǵan da shyǵar. Qazirgi kezde biz quziretti organdarmen birlese otyryp, ol balalardy qaitarý boiynsha arnaiy jospardy daiarlap jatyrmyz. Árine, olardy deradikalizatsiialaý jaǵyn da oilastyrýymyz qajet. Óitkeni ondai azamattardy beibit ómirge beiimdeý kerek. Negizgi másele - sol jaqta qalyp qoiǵan balalardy identifikatsiialaý. Bálkim, telearnalardyń bireýi ondai lagerlerge baryp, eki-úsh jaqsy reportaj túsirip kórsetse, osy jaqtaǵy týǵan týystary tanyp qalatyn shyǵar. Sonda tiisti qujattardy rásimdep, evakýatsiialaý sharalaryna kirisýge bolady", - dep atap A.Madiev.
