Moldovanyń izdeýshileri Uly Otan soǵysy jyldary maidan dalasynda qaza tapqan qazaqstandyq jaýynger Ivan Romanovich Cheredniktiń súiegin tapty. Sarbazdyń nemeresi Petropavlda turady, dep habarlaidy "Ult aqparat".
Moldovanyń izdeýshileri Pavlodardaǵy «Maidan joly» izdeý-zertteý otriadyna habarlasyp, Uly Otan soǵysy jyldary qaza tapqan jaýyngerdiń týystaryn tabýǵa kómek suraǵan.
Bul jaiynda áleýmettik jelide otriad komandiri Aleksandr Shitov jazdy.
Aleksandr Shitovtyń aitýynsha, Moldovanyń izdeýshileri Iassko-Kishinev maidan dalasynda kezekti qazba jumystaryn júrgizgen.
Biyl aqpan aiynda Hyncheshtsk aýdany Voineský eldi mekeniniń mańynda birneshe jaýyngerdiń súiegi tabylǵan.
1944 jyly tamyzda bul jerde úsh gvardiialyq diviziianyń bólimsheleri shaiqasqan eken.
Orys tarihi-patriottyq klýbynyń jáne «Avgýst» izdeý otriadynyń músheleri soǵys ýaqytynda jerlengen jaýyngerlerdiń ziratyn taýyp, súiekterin alyp shyqty.
«Birneshe jaýyngerdiń súiegin taptyq. Biraq olarǵa qatysty esh aqparat bolmady. Jaýyngerlerdi shyǵaryp jatqan kezde qaǵazǵa oralǵan zatty taptyq. Keiin durystap qaraý úshin ony alyp qoidyq. Al sońǵy jaýyngerdi kóterip jatqan kezde gimnasterkanyń qaldyǵy men gvardiialyq belgi kózge tústi. Tabylǵan zattar bul jerde gvardiialyqtardyń soǵysqanyn dáleldei tústi. Biraq, olarmen jaýyngerlerdiń aty-jónin anyqtaý múmkin emes», - deidi moldovalyq izdeýshiler.
Olardyń bar úmiti gazetke oralǵan túiinshek boldy. Qabat-qabat oralǵan túiinshekten aldymen taǵy bir gvardiialyq belgi shyqqan.
Keiin «Ozat pýlemetshi» tósbelgisi men nómiri joq «Stalingradty qorǵaǵany úshin» medali tabyldy. Al sońǵy oramadan «Erligi úshin» kúmis medali shyqty. Onyń syrtynda alty tańbaly nómiri bolǵan.
Arhivte medaldardyń iesi anyqtaldy. Ivan Romanovich Cherednik, áskeri sheni – serjant. Soltústik Qazaqstan oblysy, Peshkovskii aýdany, Troitskoe eldi mekeninde týǵan.
Ásker qataryna Presnov áskeri komissariatynan shaqyrtylypty. Al týystary degen jerde Fiokla Ivanovna Cherednik dep kórsetilgen.
«Ivan Romanovichtiń nemeresin eki kúnniń ishinde taptyq. Otbasy 1970 jyldary Troitskoe eldi mekeninen kóship ketken eken. Qazirgi tańda Petropavlda turady. Qazir biz jaýyngerdiń súiegin elge qaitarý máselesin sheshýimiz qajet. Jaýyngerdiń týǵan-týystaryn izdeýge kómektesken barsha jandarǵa – Jambyl aýdany Troitskoe eldi mekenniń turǵyndaryna, Jambyl aýdandyq politsiia bóliminiń bastyǵy Asan Meiramovqa, jýrnalisterge alǵys aitamyz», - deidi Aleksandr Shitov.
