Soltústik Qazaqstan oblysyna jumys sapary barysynda Premer-Ministr Álihan Smaiylov 20 naýryzda №1 tútin murjasynyń joǵarǵy bóligi jarym-jartylai qulaǵan Petropavl 2-JEO-ǵa bardy, dep habarlaidy "Ult aqparat" Primeminister.kz saityna silteme jasap.
«Ortalyq Aziia Elektroenergetikalyq Korporatsiiasy» AQ direktorlar keńesiniń múshesi Sergei Kan men «SEVKAZENERGO» AQ bas direktorynyń m. a. Andrei Kalinichev kásiporynnyń qazirgi jaǵdaiy, qalpyna keltirý jumystaryn júrgizý josparlary týraly baiandady. Úkimet basshysy barlyq jabdyqqa muqiiat tehnikalyq tekseris júrgizýdi jáne jóndeý jumystaryn ýaqytyly aiaqtaýdy tapsyrdy. Bul rette, turǵyndardy jazda ystyq sýmen qamtamasyz etý jáne jańa jylytý maýsymyn belgilengen merzimde bastaý asa mańyzdy.
"Barlyq jumysty sapaly, kidirissiz, kestede belgilengen merzimde aiaqtaý qajet. Kompaniia basshylyǵy barlyq qajetti qarajatty tabýy kerek", - dedi Álihan Smaiylov.
Sondai-aq Energetika ministrligine respýblikanyń jylý elektr ortalyqtary men sý elektr stantsiialarynda olardyń tehnikalyq jai-kúii men aldaǵy jylytý maýsymyna daiyndyǵy turǵysynan jospardan tys tekseris júrgizý tapsyryldy.
Buǵan qosa, sapar barysynda Álihan Smaiylov ártúrli qýattaǵy transformatorlar men shkaf konstrýktsiialaryn shyǵarýmen ainalysatyn Petropavl elektr tehnikalyq zaýytyna bardy.
"Oblysta elektr tehnikalyq zaýytty iske qosý – bul jumys istemei turǵan infraqurylymǵa tiimdi investitsiia salyp, jańa kásiporyndar qurýdyń aiqyn mysaly. Jobanyń iske asyrylýy óńirdiń mashina jasaý salasyna oń áserin tigizip, shikizattyq emes eksport kólemin ulǵaitýy tiis, bul jalpy óńdeý ónerkásibiniń ósimin qamtamasyz etedi", - dep atap ótti Álihan Smaiylov.
Premer-ministr Indýstriia jáne infraqurylymdyq damý ministrligine Qarjy ministrligimen birlesip, Petropavldaǵy toqtap turǵan obektilerdiń (ǵimarattar men qurylystardyń) bazasynda jańa óndiristik alańdar qurý úshin "Soltústik" ÁKK jarǵylyq kapitalyn ulǵaitýǵa qarajat bólýdi tapsyrdy.
Budan keiin Álihan Smaiylov M.Qozybaev atyndaǵy SQMÝ-dyń jańa oqý-zerthanalyq korpýsynyń qurylys alańyna bardy. Ony biyl paidalanýǵa berý kózdelgen.
"Memleket basshysy Qazaqstanda bedeldi sheteldik joǵary oqý oryndarynyń filialdaryn ashýdy tapsyrdy. M.Qozybaev atyndaǵy SQMÝ bazasynda Arizona ýniversitetiniń filialyn ashý - osyndai alǵashqy jobalardyń biri. Úkimet injenerlik jáne agrotehnikalyq ǵylymdar salasynda halyqaralyq deńgeidegi mamandardy daiarlaýǵa óńir qajettilikteri úshin 1500 grant bóldi", - dedi ol.
Álihan Smaiylov jańa oqý-zerthana korpýsy men 600 oryndyq eki stýdentter jataqhanasynyń qurylysyn belgilengen merzimde aiaqtaýdy tapsyrdy.
Sondai-aq QR premer-ministri Petropavldaǵy Sh.Ýálihanov kóshesindegi jeti jańa kóppáterli úidiń qurylys barysymen tanysty. Joba boiynsha páterlerdiń jalpy sany - 684.
"Jyl saiyn biz qurylys qarqyny aitarlyqtai artyp kele jatqanyn kórip otyrmyz. "Nurly jer" baǵdarlamasy aiasynda Úkimet jańa turǵyn úi men injenerlik jelilerdi salýǵa biýdjetten edáýir qarajat bólýde. Osyǵan bailanysty barlyq joba boiynsha júrgizilip jatqan jumystardyń sapaly bolýyn qadaǵalaý qajet", dedi Álihan Smaiylov.
Premer-ministrdiń jumys sapary barysynda barǵan taǵy bir nysany "RimQazAgro" JShS qaǵaz fabrikasynyń qurylysy boldy.
Kásiporynnyń jobalyq qýaty - jylyna 5 myń tonna ónim, bul respýblika boiynsha 16 paiyzdyq importty almastyrýdy qamtamasyz etýi tiis. Zaýyt osy jyldyń sońyna deiin paidalanýǵa beriledi dep josparlanǵan.
Premer-Ministr QR Prezidentiniń «qarapaiym zattar ekonomikasyn» damytý jónindegi alǵa qoiǵan mindetteri aiasynda halyq tutynatyn taýarlardyń aýqymdy nomenklatýrasynyń óndirisin qurý qajet ekenin atap ótti.
«Qaǵaz ónimderin shyǵarý jobasyn iske asyrý óńirdiń áleýmettik-ekonomikalyq damýyna mýltiplikativti áser beretinine senimdimin», — dedi Álihan Smaiylov.
