QR Premer-Ministri Álihan Smaiylov Shveitsariia elshisi David Griftingpen kezdesip, temirjol salasyndaǵy strategiialyq yntymaqtastyq máselelerin talqylady. Bul týraly primeminister.kz saity habarlady.
Kezdesýge sonymen qatar Qazaqstannyń memlekettik organdarynyń, «QTJ» UK» AQ-nyń ókilderi jáne shveitsariialyq Stadler Bussnang AG kompaniiasynyń basshylary qatysty.
Eske sala keteiik, 2021 jylǵy 29 qarashada Jenevada ótken investitsiialyq dóńgelek ústel otyrysy aiasynda Qazaqstan men Shveitsariia Prezidentteriniń qatysýymen ártúrli salalarda birqatar kommertsiialyq kelisimge qol qoiyldy.
Búgingi kezdesý barysynda QR Premer-Ministri Álihan Smaiylov qazirgi qubylmaly ahýalǵa qaramastan, Qazaqstannyń tranzittik múmkindikterine ulttyq, jahandyq deńgeilerde qyzyǵýshylyq baiqalyp otyrǵanyn, kólik-logistika qyzmetterine degen suranystyń artyp kele jatqanyn atap ótti.
Á. Smaiylov qazaqstandyq mashina jasaý salasy ulttyq ekonomikanyń áleýeti zor salalarynyń biri ekenin jáne ony jergilikti deńgeide damytý úshin tiisti múmkindikterdiń bar ekenin jetkizdi.
«QTJ» UK» AQ jyljymaly quramdy jańartý boiynsha josparly jumys júrgizip jatyr. Olardyń tozýy shamamen 60 paiyzdy quraidy, sondyqtan olardy birtindep jańartýymyz kerek. Bul joba biz úshin, ásirese Qazaqstandaǵy jergilikti óndiristi keńeitý turǵysynan óte mańyzdy», — dedi QR Premer-Ministri.
Shveitsariia tarapynyń ókilderi «Made in Kazakhstan» zamanaýi jyljymaly temirjol quramynyń álemdik sapa standarttaryna sáikes keletin óndirisin jolǵa qoiýǵa, personaldy oqytýdy qamtamasyz etýge, jergiliktendirý jónindegi talaptardy saqtaý boiynsha mindettemelerdi oryndaýǵa daiyn ekendikterin jáne Qazaqstandy osy aimaqtaǵy negizgi alań retinde kórgisi keletinderin aitty.
Kezdesý qorytyndysy boiynsha Premer-Ministr Álihan Smaiylov Qazaqstan Respýblikasynyń temirjol salasyndaǵy jáne basqa da salalardaǵy strategiialyq yntymaqtastyqty damytýǵa múddeliligin rastady.
