Nur-Sultanda QR Premer-Ministri Álihan Smaiylovtyń tóraǵalyǵymen bilim berý júiesin qaita formattaý jáne ekonomikanyń qajettilikterine sai kadrlar daiarlaýdy qamtamasyz etý máseleleri jóninde keńes ótti, dep habarlaidy primeminister.kz.
Memleket basshysynyń tapsyrmasyn oryndaý maqsatynda «Qazaqstan Respýblikasyndaǵy jańa kásipter men quzyretter atlasy» ázirlenip, ol 2020 jyly bekitildi. Qujat 2025 jylǵa deiingi halyqtyń tabysyn arttyrý baǵdarlamasyna engizilgen jáne eńbek naryǵy men kásibi standarttardy boljaýǵa negiz bolyp tabylady.
Atlas munai jáne gaz, energetika, aýyl sharýashylyǵy, aqparattyq tehnologiialar, týrizm, kólik jáne logistika, mashina jasaý, taý-ken metallýrgiiasy jáne qurylys salalarynan turatyn 9 basym baǵyt boiynsha júzege asyrylady.
Qazaqstanda joiylyp bara jatqan 129 mamandyq tirkelgen, 95 mamandyq transformatsiia protsesinde, 239 jańa mamandyq paida boldy (onyń 37-si munai jáne gaz salasynda, 32-si energetikada, 11-i mashina jasaýda, 40-y AT salasynda jáne t. b.).
QR bilim jáne ǵylym ministri Ashat Aimaǵambetov kadrlardy daiarlaýdy qamtamasyz etý júiesine memlekettik organdar men jumys berýshiler qaýymdastyqtarynyń ókilderi qatysyp jatqanyn atap ótti.
Qazirgi eńbek naryǵy bilim berý mekemeleriniń, qyzmetkerler men jumys berýshilerdiń jańa salalarǵa, kásipter men daǵdylarǵa jedel beiimdelýin talap etedi. 2022 jyly QR joǵary oqý oryndary 91 innovatsiialyq baǵdarlama ázirledi, 2025 jylǵa qarai ony 200-ge deiin jetkizý josparlanyp otyr. Sonymen qatar tehnikalyq daiarlaý baǵyttaryna memlekettik tapsyrystyń úlesi 60%-ǵa deiin ulǵaityldy.
Sondai-aq biyl Qazaqstannyń 406 ónerkásiptik kásiporny 406 TKBB kolledjin qamqorlyqqa alǵan. 2021 jyly bar bolǵany 51 oqý orny qamqorlyqqa alyndy. Qoldaý kórsetetin kásiporyndar qamqorshylyq jáne indýstriialyq keńesterdiń quramyna kiredi, pedagogterdiń taǵylymdamadan ótýine kómektesedi, oqýshylardyń óndiristik praktikadan ótýine jaǵdai jasaidy jáne túlekterdi jumysqa ornalastyrý boiynsha ózderine belgili bir mindet alady.
Biyl Qazaqstanda kásiporyndardyń ótinimderi boiynsha 10 myń maqsatty memlekettik tapsyrys bólindi. Kolledjderde tehnikalyq daiarlaý baǵyttaryna memlekettik tapsyrys úlesi 40%-dan 70%-ǵa deiin ulǵaityldy.
Buǵan qosa, kolledjder jumys berýshilermen jáne qamqorlyqqa alýshy kásiporyndarmen kelisilgen bilim berý baǵdarlamalaryn ázirlei bastady.
«Kásipter atlasynyń» ázirlenýine jáne naryqtyń tehnikalyq mamandarǵa qajettiliginiń arttyrýyna qaramastan, Qazaqstanda kadrlarǵa qajettilikti boljaý áli de jetkilikti damymaǵany, qazirgi bilim berý baǵdarlamalary eńbek naryǵy talaptarynyń ózgerýin jáne qajettilik boiynsha boljamdardy tolyq kólemde kórsete almaityny atap ótildi.
«Kásipter atlasyn» aýqymdy túrde engizý úshin oqý oryndarynyń bilim berý baǵdarlamalaryna túzetý engizip, bilim berý mekemelerinde jergilikti atqarýshy organdardyń memlekettik tapsyrysyn ornalastyrýdy túzetý usynyldy.
Otyrysqa qatysýshylardyń baiandamalaryn tyńdaǵannan keiin Álihan Smaiylov hattamaǵa birqatar naqty tapsyrma engizýdi, sondai-aq QR Úkimeti otyrysynda bilim berý júiesin qazirgi jaǵdaiǵa beiimdep qaita qalyptastyrý máselelerin qaraýdy tapsyrdy.
