Búgin Úkimet úiinde QR Premer-Ministri Álihan Smaiylov Halyqaralyq tennis federatsiiasynyń prezidenti Devid Haggertimen kezdesý ótkizdi. Bul týraly Úkimettiń baspasóz qyzmeti habarlady.
Áńgime barysynda tennisti damytý jáne atalǵan sport túrin Qazaqstanda ilgeriletýge qatysty ózara is-qimyl máseleleri talqylandy.
«Tennis – álemdegi eń áserli jáne jaqsy tanylǵan sport túrleriniń biri. Buǵan dálel – milliondaǵan jankúierler men osy sportqa degen qyzyǵýshylyqtyń udaiy artýy. Búginde tennis sporty bizdiń azamattarymyzdyń da erekshe qyzyǵýshylyǵyn týdyryp otyr. Bul – elimizdiń álemdik qoǵamdastyqtaǵy sporttyq imidjin nyǵaitý jolyndaǵy basym baǵyttardyń biri», — dedi Smaiylov.
Óz kezeginde Devid Haggerti Qazaqstanda tennispen turaqty túrde ainalysý úshin qolaily jaǵdai jasaýǵa, kásibi tennisshilerdi tárbieleýge jáne jas oiynshylardy jan-jaqty qoldaýǵa erekshe kóńil bólinetinin atap ótti.
Qazirgi tańda respýblikamyzda 33 myńnan astam adam úlken tennispen shuǵyldanady, onyń ishinde 15 myń bala bar. Elimizde barlyǵy 46 tennis zaly jumys isteidi. Balalar men jasóspirimderdiń oblystyq sport mektepterinde 30 tennis bólimshesi ashyldy.
Oiynshylardyń jarysqa túsip, tájiribe jinaýy úshin elde jyl saiyn 40-qa jýyq halyqaralyq týrnir ótkiziledi, olardyń qatarynda «ATP Challenger», «ITF Women’s», «World Tennis Tour: Men’s, Women’s», «ITF Junior», «ATF Junior 14&U» týrnirleri bar.
Aita keteiik, ITF prezidenti Nur-Sultan qalasyna biyl 15-16 sáýirde ótetin Qazaqstan men Germaniia áielder quramalary arasyndaǵy tennisten komandalyq álem chempionatynyń finalyna biliktilik kezeńi aiasynda keldi.
