Premer-Ministr Álihan Smaiylov Úkimettiń Tsifrlyq keńsesinde ortalyq memlekettik organdardyń basshylarynyń jáne óńirler ákimderiniń qatysýymen QR Prezidenti Qasym-Jomart Kemeluly Toqaevtyń osy jyldyń basynan beri bergen tapsyrmalaryn iske asyrý jóninde keńes ótkizdi. Bul jaiynda Úkimettiń resmi saity habarlady.
Elde bolǵan tártipsizdikter kezinde 351 jyljymaityn múlik nysany zardap shekti, olardy jóndeý-qalpyna keltirý jumystaryn júrgizý qajet.
Onyń ishinde 8 óńirdegi 45 memlekettik organ ǵimaraty jáne 306 kommertsiialyq nysan bar. Olar Almaty, Shymkent qalalarynda, Almaty, Jambyl, Qyzylorda, Atyraý, Aqtóbe jáne Shyǵys Qazaqstan oblystarynda.
Bizneske aldyn ala keltirilgen shyǵyn mólsheri 98,1 mlrd teńgeni quraidy, onyń 97%-y Almaty qalasyna tiesili.
Smaiylov Indýstriia jáne infraqurylymdyq damý ministrligine óńirlerdiń ákimdikterimen birlesip, belgilengen merzimde búlingen ǵimarattardy tehnikalyq-saraptamalyq tekserýden ótkizý jáne jóndeý qunyn baǵalaý jumystaryn aiaqtap, qajetti qujattamany Qarjy ministrligine engizýdi tapsyrdy.
Tártipsizdikterden keltirilgen zalaldy baǵalaý jónindegi úkimettik komissiiaǵa jergilikti atqarýshy organdarmen birlesip, zalaldy baǵalaýdy jedel aiaqtaý jáne zardap shekken biznes sýbektileriniń tizimi men olarǵa keltirilgen zalal kólemin Ulttyq ekonomika ministrligine jiberý tapsyryldy.
«Úkimet apta saiyn zardap shekken kásipkerlerge jedel kómek kórsetý úshin qarajat bólý boiynsha qajetti sharalardy júrgizýge daiyn», — dedi Álihan Smaiylov.
Úkimet basshysy kómir baǵasynyń ósýine jol bermeýdiń mańyzdylyǵyn atap ótip, bul máseleni kómir óndirýshi kompaniialarmen pysyqtaýdy, sondai-aq kómir tasymaldaý tarifteriniń negizsiz ósýine jol bermeý úshin taldaý júrgizýdi tapsyrdy.
«Keibir kompaniialardyń kirmejoldar men tuiyq joldardaǵy qyzmet kórsetý tarifi joǵary, olardy qaita qarastyrý qajet», — dedi Premer-ministr.
