Nur-Sultanda Premer-Ministr Álihan Smaiylovtyń tóraǵalyǵymen Daǵdarysqa qarsy sharalar jónindegi jedel shtabtyń kezekti otyrysy ótti, dep habarlaidy "Ult aqparat" Úkimettiń resmi saityna silteme jasap.
Otyrysqa qatysýshylar Qytaimen shekarada júkterdiń ári-beri ótýine qatysty máseleni talqylady.
Qazirgi tańda Qazaqstan-Qytai shekarasynda bes avtomobil jáne eki temirjol ótkizý pýnkti, sondai-aq «Qorǵas» ShYHO» AQ keden beketiniń júk terminaly jumys isteidi.
Avtomobil kóligi boiynsha biylǵy úsh aida ótken jyldyń sáikes kezeńimen salystyrǵanda kólik quraldarynyń sany 123%-ǵa (6,3-ten 14,0 myń KQ-ǵa deiin) óskeni baiqalady.
Sonymen qatar kedendik qun indeksi (KQI) jáne kedendik tólemder indeksi (KTI) boiynsha oń dinamika baiqalady: KQI kórsetkishi 75%-ǵa ósti (QHR-dan importtalatyn taýarlar boiynsha 1 kg úshin 4 dollardan 7 dollarǵa deiin), KTI kórsetkishi eki ese – 264 teńgeden 561 tg/kg deiin ósti.
«Nur joly» shekaradaǵy ótkizý pýnktine keler bolsaq, taýar tasymaldaýdy uiymdastyrýshy retinde jumysyn bastaǵan «KTZ Express» AQ arqasynda onyń ótkizý qabileti kúnine 10-nan 47 AKQ-ǵa deiin artty. Bul oraida bir tasymal quny $4500-den $2050 deiin tómendedi. Qolma-qol aqshalai ózara esep aiyrysý alynyp tastaldy, bul qarajatty kóleńkeli ainalymnan shyǵarýǵa múmkindik berdi. Sonymen qatar elektrondy kezek boiynsha pilot jobasy iske qosyldy.
«Qorǵas» ShYHO-da jyl basynan beri arnaiy kran arqyly 61 KQ aýystyryp tieldi. Bul rette tarif eki ese tómendetildi.
Otyrys barysynda ótkizý pýnktterinde keptelis joq jáne jaǵdai turaqty ekendigi atap ótildi.
«QR Premer-Ministri Álihan Smaiylov statistikalyq sáikessizdikterdi boldyrmaý úshin tiisti vedomstvolarǵa import pen eksportqa qatysty derekterdi ózektendirýdi, sondai-aq ótkizý pýnktterinde MKK, UQK ShQ jáne QTJ-Ekspress vedomstvoaralyq ózara is-qimylyn kúsheitýdi tapsyrdy», - delingen habarlamada.
Sondai-aq birqatar ózekti másele talqylandy.
