Qazaqstandyq jas ánshi, «Slavian bazary» halyqaralyq baiqaýynyń Gran-pri iegeri Rýhiia Baidúken jeńisten keiingi óz áserimen bólisti, dep habarlaidy QazAqparat.
«Slavian bazary» baiqaýyn bala kúnimnen jibermei qarap kelemin. Jyl saiyn asyǵa kútemin. Anama osy baiqaýǵa baryp qatysyp, jeńispen kelemin dep únemi aitatynmyn. Jáne bala kúnimde osy saiysqa Qazaqstannyń atynan qatysatyn alǵashqy qyz bala bolamyn deitinmin. Baiqaýǵa baratynym belgili bolǵan soń 3 ai boiy úzdiksiz daiyndaldym. Tipti osy baiqaýǵa qatysýym úshin 23 kelige aryqtadym. Jalpy ózim bala kúnimnen aldyma maqsat qoiyp, soǵan jetip kelemin», - dedi R. Baidúken ZOOM alańynda ótken baspasóz máslihatynda.
Sondai-aq, jas ánshi aldaǵy ýaqytta da otandyq jáne sheteldik mýzykalyq jobalarǵa qatysqysy keletinin aitty.
«Baiqaýǵa jalǵyz ózim bardym. Aldymen Belarýs astanasy Minskide prezident orkestrimen daiyndyq ótkizdik, sosyn Vitebskige bardyq. Baiqaý eki kúnge sozyldy, jeńiske jetetinime alǵashynda kúmándandym, sebebi qarsylastarym myqty boldy. Degenmen barynsha ózime senimdilik tanyttym», - deidi ol.
Aita keteiik, 14 memleketten kelgen qatysýshy slavian elinen shyqqan kompozitordyń týyndysyn slavian tobyna jatatyn tildiń birinde orkestrdiń súiemeldeýimen oryndady. Baiqaý nátijesinde jerlesimiz Gran-pri iegeri atanyp, «Altyn lira» músinshesimen birge 20 myń AQSh dollaryna ie boldy.
