Belarýstiń Vitebsk qalasynda ótetin «Slavian bazary» halyqaralyq óner festivalinde Qazaqstan namysyn «Ámire» atymen belgili - Ernar Sadyrbaev qorǵaityn bolady. Ol Nurǵisa Tilendievtiń «Qustar ánin» ózgeshe sipatta oryndamaq. Bul týraly ánshi Astanadaǵy Ortalyq kommýnikatsiialar ortalyǵynda ótken baspasóz máslihatynda aitty, dep habarlaidy QazAqparat tilshisi.
«Roza Qýanyshqyzy men Dimash Qudaibergenniń «Slavian bazaryna» tórelik etýi maǵan qoldaý bolary anyq. Baiqaýǵa úsh aidan beri daiyndalýdamyn. Nurǵisa Tilendievtiń «Qustar ánin» baiqaýda ózgeshe stilde oryndaimyn. Ekinshi án - Raimond Paýlstyń «Podberý mýzyký» áni. Ol ándi ekinshi kúni orkestrmen birlese oryndaimyz. Úshinshi án - rok-opera Motsart miýziklynan frantsýz tilindegi án bolady. Ándi óńdeý jaǵynan bolsyn, mýzyka jaǵynan bolsyn, sipat turǵysynan da daiyndyq jaqsy. Roza Qýanyshqyzy aitqandai, eń bastysy ishki daiyndyq kerek. Akterlyq sheberliktiń de qyr-syry túsindirilip jatyr», - deidi Ernar Sadyrbaev.
Aita ketsek, «Slavian bazary» halyqaralyq óner festivali Belarýs memleketin dúniejúzine tanymal etti. 1995 jyldan bastap festival Belarýs Respýblikasynyń prezidenti Aleksandr Lýkashenkonyń jeke qoldaýymen halyqtar arasyndaǵy mádeni dialogtyń qalyptasýyna yqpal etip keledi. Festival kúnderi dástúrli túrde odaqtas memleketter kúni, Belarýs, Resei, Ýkraina elderiniń óner ieleriniń gala-kontserti, «Shekarasyz festival», «Teatr kezdesýleri», «Juldyzdy sát» baǵdarlamalary ótkiziledi.
Atalǵan festivalde Qazaqstannyń Halyq ártisi Roza Rymbaeva men Dimash Qudaibergen tórelik etetin bolady.
