بەلارۋستٸڭ ۆيتەبسك قالاسىندا ٶتەتٸن «سلاۆيان بازارى» حالىقارالىق ٶنەر فەستيۆالٸندە قازاقستان نامىسىن «ەمٸرە» اتىمەن بەلگٸلٸ - ەرنار سادىرباەۆ قورعايتىن بولادى. ول نۇرعيسا تٸلەنديەۆتٸڭ «قۇستار ەنٸن» ٶزگەشە سيپاتتا ورىنداماق. بۇل تۋرالى ەنشٸ استاناداعى ورتالىق كوممۋنيكاتسييالار ورتالىعىندا ٶتكەن باسپاسٶز مەسليحاتىندا ايتتى, دەپ حابارلايدى قازاقپارات تٸلشٸسٸ.
«روزا قۋانىشقىزى مەن ديماش قۇدايبەرگەننٸڭ «سلاۆيان بازارىنا» تٶرەلٸك ەتۋٸ ماعان قولداۋ بولارى انىق. بايقاۋعا ٷش ايدان بەرٸ دايىندالۋدامىن. نۇرعيسا تٸلەنديەۆتٸڭ «قۇستار ەنٸن» بايقاۋدا ٶزگەشە ستيلدە ورىندايمىن. ەكٸنشٸ ەن - رايموند پاۋلستىڭ «پودبەرۋ مۋزىكۋ» ەنٸ. ول ەندٸ ەكٸنشٸ كٷنٸ وركەسترمەن بٸرلەسە ورىندايمىز. ٷشٸنشٸ ەن - روك-وپەرا موتسارت ميۋزيكلىنان فرانتسۋز تٸلٸندەگٸ ەن بولادى. ەندٸ ٶڭدەۋ جاعىنان بولسىن, مۋزىكا جاعىنان بولسىن, سيپات تۇرعىسىنان دا دايىندىق جاقسى. روزا قۋانىشقىزى ايتقانداي, ەڭ باستىسى ٸشكٸ دايىندىق كەرەك. اكتەرلىق شەبەرلٸكتٸڭ دە قىر-سىرى تٷسٸندٸرٸلٸپ جاتىر», - دەيدٸ ەرنار سادىرباەۆ.
ايتا كەتسەك, «سلاۆيان بازارى» حالىقارالىق ٶنەر فەستيۆالٸ بەلارۋس مەملەكەتٸن دٷنيەجٷزٸنە تانىمال ەتتٸ. 1995 جىلدان باستاپ فەستيۆال بەلارۋس رەسپۋبليكاسىنىڭ پرەزيدەنتٸ الەكساندر لۋكاشەنكونىڭ جەكە قولداۋىمەن حالىقتار اراسىنداعى مەدەني ديالوگتىڭ قالىپتاسۋىنا ىقپال ەتٸپ كەلەدٸ. فەستيۆال كٷندەرٸ دەستٷرلٸ تٷردە وداقتاس مەملەكەتتەر كٷنٸ, بەلارۋس, رەسەي, ۋكراينا ەلدەرٸنٸڭ ٶنەر يەلەرٸنٸڭ گالا-كونتسەرتٸ, «شەكاراسىز فەستيۆال», «تەاتر كەزدەسۋلەرٸ», «جۇلدىزدى سەت» باعدارلامالارى ٶتكٸزٸلەدٸ.
اتالعان فەستيۆالدە قازاقستاننىڭ حالىق ەرتٸسٸ روزا رىمباەۆا مەن ديماش قۇدايبەرگەن تٶرەلٸك ەتەتٸن بولادى.
