«Vitebskidegi Slavian bazary» XXXI halyqaralyq óner festivaliniń «Vitebsk-2022» estrada ánshileriniń halyqaralyq baiqaýynda P.Chaikovskii atyndaǵy Almaty mýzyka kolledjiniń oqytýshysy Erik Tólenov (sahnalyq esimi Kyle Ruh), al balalar baiqaýy aiasynda Alinur Hamzin óner kórsetedi, dep habarlaidy "Ult aqparat" Mádeniet jáne sport ministrliginiń baspasóz qyzmetine silteme jasap.
Baiqaý 13-18 shilde aralyǵynda ótip, oǵan 24 eldiń ókili qatysady.
«Dástúrli túrde ánshilerimiz joǵary oryndarǵa ie bolyp, osy bedeldi festivalde elimizdi abyroimen tanystyryp keledi. Árine osynaý tolaiym tabys - artister men olardyń oqytýshylary atqarǵan aýqymdy jumystyń dáleli. Otandyq vokal mektebi biylǵy jyly da joǵary deńgeidi kórsetetinine senimdimin», - dedi Mádeniet jáne sport ministri Dáýren Abaev Erik Tólenovpen kezdesý barysynda.
Qazaqstandyq ánshiler jyl saiyn, naqtyraq aitqanda 20 jyl boiy festivaldiń eresekter men balalar baiqaýyna qatysyp, júldeli oryndarǵa ie bolyp kele jatqanyn atap ótý qajet. Mysaly Dimash Qudaibergen – 2015 jyly, Ádilhan Makin – 2019 jyly, Rýhiia Baidúkenova – 2021 jyly bas júlde jeńip aldy. Sonymen qatar ár jyldary Álisher Kárimov pen Ernar Sádirbaev (Amre) júldeger atandy.
Biyl balalar baiqaýynyń qazylar alqasy quramyna halyqaralyq baiqaýlardyń laýreaty, qazaqstandyq tanymal ánshi Álisher Kárimov kirip otyr. Buǵan deiin festivaldiń qazylar alqasynyń quramynda Roza Rymbaeva, Naǵima Esqalieva, Erlan Kókeev, Tolqyn Zabirova, Batyrhan Shókenov, Qarlyǵash Ábdikárimova, Qarlyǵash Ájieva bolsa, Dimash Qudaibergen «Vitebsk-2021» estrada ánshileriniń halyqaralyq baiqaýynyń qazylar alqasynyń eń jas múshesi boldy.
Festival jalaýyn Roza Baǵlanova atyndaǵy «Qazaqkontsert» memlekettik kontserttik birlestiginiń ánshisi, «Slavian bazary-2021» baiqaýynyń Gran-pri iegeri, «Daryn» jastar syilyǵynyń jáne «Shapaǵat» medaliniń iegeri Rýhiia Baidúkenova kóteredi.
