Soltústik Qazaqstan oblysynda jeńil kólikpen iri qara maldy tasymaldaǵan turǵyndy politseiler ákimshilik jaýapkershilikke tartty, dep habarlaidy "Ult aqparat".
Petropavldyń 44 jastaǵy turǵyny jeńil kóliktiń artqy oryndyq bóligine buzaý salyp, tasymaldaǵan. Ony jolda júrgizýshilerdiń biri túsirip alyp, áleýmettik jelige salyp jibergen. Bul jazba tártip saqshylarynyń nazaryn aýdardy. Politseiler kóliktiń nómirimen júrgizýshini anyqtap, ákimshilik jaýapkershilikke tartty.
«Jolaýshylar men júkterdi tasymaldaýda, qaýipsizdik beldikterin nemese mototsikl shlemderin paidalanýda jol erejelerinde kózdelgen talaptardy saqtamaý» baby boiynsha kólik júrgizýshisi aiyppul tóleidi. Budan basqa SQO PD patrýldik politsiia batalonynyń qyzmetkerleri mundai jaǵdai taǵy qaitalanbaýy úshin er adammen profilaktikalyq áńgime júrgizdi», - delingen politsiia habarlamasynda.
Bul bap boiynsha aiyppuldyń mólsheri – 5 AEK, iaǵni 14 585 teńge.
