Soltústik Qazaqstan oblysynyń ákimi Qumar Aqsaqalov koronavirýs infektsiiasyn juqtyrǵan turǵyndardyń jaǵdaiyn baiandady, dep habarlaidy QazAqparat.
«Qazir oblysta koronavirýs juqtyrǵan 7 adam tirkeldi. Petropavl qalasynda 3 jańa oqiǵa anyqtaldy. Eki áiel oblys ortalyǵynda aýrý juqtyrǵan áielmen birge jumys istegen. Olar qalalyq jumyspen qamtý ortalyǵynda eńbek etken. Sonymen birge, Petropavl qalasynyń karantindik statsionarynyń meditsinalyq qyzmetkeri virýs juqtyrdy», - dedi oblys ákimi «QYZYLJAR» telearnasynyń tikelei efirinde.
Taǵy bir virýs juqtyrý oqiǵasy Taiynsha qalasynda tirkeldi. Aýdandyq aýrýhananyń laboranty Kellerovkadan kelgen naýqas áielmen bailanysqan. Qazir Taiynsha qalasy jáne ondaǵy aýdandyq aýrýhana 14 kúnge karantinge jabyldy.
Ákimniń aitýynsha, naýqastardyń barlyǵy Petropavl qalasynyń juqpaly statsionaryna jatqyzyldy. Jaǵdailary birqalypty. Bailanysta bolǵandar anyqtalyp, karantindik statsionarǵa jiberilgen.
Ekinshi juqtyrý jaǵdaiy Kellerovka aýylynyń 40 jastaǵy turǵynynan tabyldy. Ol aýyldyq ambýlatoriiada saniarlyq qyzmetker bolyp jumys istegen. Naýqas Petropavl qalasynyń juqpaly statsionaryna jetkizildi. Aýyl 14 kúnge karantinge jabyldy. Naýqaspen bailanysqan turǵyndar Kellerovkanyń karantindik gospitaline jáne úi karantinine jatqyzyldy. Alynǵan barlyq synmalar teris nátije kórsetti.
Kellerovkaǵa kirýge jáne shyǵýǵa tyiym salyndy. Onda tek azyq-túlik pen dári-dármek jetkiziledi. Qoǵamdyq oryndar dezinfektsiialandy. Barlyq oqiǵalar boiynsha virýs tabylǵan jumys jáne úi oshaqtary oqshaýlanyp, sanitarlyq jáne dezinfektsiialyq óńdeý júrgizildi.
«Qazir Petropavlda 5 juqtyrý oshaǵy bar. Kópqabatty úilerdiń turǵyndaryna shydammen jáne sabyrmen qaraýdy suraimyn. Qazir sýpermarketter azyq-túlik jetkizýmen ainalysyp jatyr. Naýqastardyń biri birinshi qalalyq emhanaǵa barǵan. Sondyqtan, turǵyndardan meditsinalyq mekemelerge barmaýdy ótinemin. Dárigerlerdiń ózi sizderge barady», - dedi Q. Aqsaqalov.
KVI belgileri baiqalǵan jaǵdaida, 1406 nemese 103 nómirlerine habarlasý qajet.
