Soltústik Qazaqstan oblysynda úsh sý qoimasy bolsa, sonyń ekeýi – Sergeev jáne Petropavl sý qoimalary shamamen 90 %-ǵa deiin tolǵan, dep habarlaidy "Ult aqparat".
Búgin SQO óńirlik kommýnikatsiialar qyzmetiniń brifinginde tótenshe jaǵdailar departamentiniń mamandary kóktemgi sý tasqynynyń aldyn alýǵa qatysty óńirde atqarylyp jatqan jumyspen tanystyrdy.
Meteorologiialyq boljam boiynsha jáne ylǵal qoryn saralai kele mamandar biyl SQO-da kóktemde sý tasqyny bolady degen boljam jasap otyr.
«Kúzgi ylǵal qory kei jerlerde normadan 36%-ǵa artyq. Qar qalyńdyǵy jyldaǵydai bolǵanymen, topyraq 60-150 sm aralyǵynda qatqan. Sergeev sý qoimasy 88,1%-ǵa tolyp, muz qalyńdyǵy 70 sm-ge jetken. Petropavl sý qoimasy 89%-ǵa tolǵan, muz qalyńdyǵy – 41 sm», - deidi SQO TJD bólim bastyǵy Serik Naýryzbaev.
Arnaiy qyzmetterdiń kóktemgi sý tasqynyna ázirligin tekserý maqsatynda 4-5 naýryz aralyǵynda «Kóktem-2021» respýblikalyq komanda-shtabtyq jattyǵýy ótedi.
Jaǵdaidy baqylaýda ustaý úshin departamentte arnaiy shtab ta qurylǵan.
«Qazir SQO-da 6 myńnan astam turǵyny bar 79 eldi mekendi kóktemde sý basý qaýpi bar. Onyń 30-y ózenderdiń, 13-i kólderdiń tasýynan, qalǵany erigen qar sýynan zardap shegýi múmkin. Taǵy 92 eldi mekendi baqylaýda ustap otyrmyz. Sý tasqynymen kúreske 484 adamnan quralǵan arnaiy toptar jasaqtaldy. Olardyń qaramaǵynda 155 tehnika, 8 júzý quraly jáne 83 motopompa bar. Kúrdeli jaǵdai týyndaityn bolsa qosymsha 2 myńǵa jýyq adam, 1,5 myńǵa jýyq tehnika tartylady», - deidi Serik Naýryzbaev.
Búginge deiin eldi mekenderden 780 tekshe metr qar shyǵaryldy. Bul jumys áli de jalǵaspaq.
