Soltústik Qazaqstan oblysyna jyl basynan beri barlyǵy 203 adam qonys aýdardy. Búginge deiin jumysqa jaramdy 89 adamnyń tek 29 paiyzy ǵana qyzmetke ornalasqan. Bul jaiynda Soltústik Qazaqstan oblysy ákimdiginiń otyrysynda oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy Sergei Iakovenko aitty.
- Jumysqa jaramdy qonys aýdarýshylardyń 29%-y (26 adam) jumysqa ornalasty. Sonyń ishinde aýyl sharýashylyq salasyna 14 adam, bilim salasyna tórt, densaýlyq saqtaý salasyna úsh adam, basqa salalarda bes adam jumysqa turdy, - dedi Sergei Iakovenko.
Soltústik Qazaqstan oblysynyń ákimi Qumar Aqsaqalov jiynda qonys aýdarǵandardy jumyspen qamtý - basty tapsyrmalardyń biri ekenin aityp, olardyń oblystan ketip qalmaýy úshin barlyq jaǵdaidy jasaýdy tapsyrdy.
Resmi málimet boiynsha, jyl basynan beri Soltústik Qazaqstanǵa 50 otbasy (203 adam) qonys aýdarǵan. Onyń ishinde 19 otbasy (77adam) Ońtústik Qazaqstan oblysynan, 13 otbasy (55 adam) Jambyl oblysynan, 11 otbasy (47 adam) Almaty oblysynan jáne jeti otbasy (24 adam) Qyzylorda oblysynan kóship barǵan. Bul kórsetkish jyldyq jospardyń tek 7,2 paiyzyn quraidy.
Oblystyq jumyspen qamtýdy úilestirý jáne áleýmettik baǵdarlamalar basqarmasy mamandarynyń aitýynsha, jyl sońyna deiin barlyǵy 767 otbasyny (3445 adam) qabyldaý josparlanǵan.
Statistika boiynsha, byltyr oblysqa ońtústik oblystardan 181 otbasy (802 adam) kóship barǵan.
Qazaqstan úkimeti eldiń soltústik pen shyǵys óńirlerindegi "jumys kúshine tapshy" aimaqtarǵa ońtústiktegi "jumys kúshi artyq" oblystardan mamandardy shaqyrý naýqanyn birneshe jyl buryn bastaǵan. Bul aimaqtar 2013 jyly qabyldanǵan "Jumyspen qamtý 2020 jol kartasy" baǵdarlamasy negizinde azamattardy kóshirý josparyn jasaýǵa kirisken.
