Soltústik Qazaqstan oblysy koronavirýs boiynsha «jasyl» aimaqqa enip, jańa jaǵdailar tirkelmegendikten 5 eldimekennen karantin alyndy, dep habarlaidy "Ult aqparat".
SQO Sanitariialyq-epidemiologiialyq baqylaý departamenti bastyǵynyń orynbasary Tatiana Gorlovanyń qatysýymen búgin óńirdegi epidemiologiialyq jaǵdai boiynsha brifing ótti.
T.Gorlovanyń aitýynsha, sońǵy táýlikte SQO-da aýrýdyń 35 jaǵdaiy tirkelgen. Sonyń 18-i Petropavl qalasynda, 3-ýi Mamliýt aýdanynda, Qyzyljar men Ýálihanov aýdandarynda - 6 jáne Ǵ.Músirepov, M.Jumabaev aýdandarynda 1 jaǵdaidan anyqtaldy. Jalpy aýyrǵandar sany 4841-ge jetken.
«Onyń 30-ynda PTR-test epidemiologiialyq kórsetkishke orai alynsa, shekaradan ótken eki adamnan jáne epidemiologiialyq baqylaý aiasynda taǵy úsh adamnan anyqtaldy. Áli de eń úlken úles – 46% 50 jastan asqandarǵa tiesili», - deidi Tatiana Gorlova.
Qazir SQO-da 8 aýdannyń 11 eldimekeni karantinge jabyq. Jaǵdaidyń jaqsarýyna bailanysty buryn jabylǵan 5 aýyldan – Aqjar aýdanyndaǵy Kazanskoe, Leningradskoe eldimekenderinen, Taiynsha aýdanyndaǵy Kirov pen Chermoshniankadan jáne Shalaqyn aýdanyndaǵy Povozochnoedan karantin alyndy.
«SQO búginnen bastap koronavirýs boiynsha «jasyl» aimaqqa endi. Biraq, buǵan qýanýǵa áli erte. Jaǵdai kúnde ózgerýde. Erteń-aq kórsetkish artýy múmkin. Sol sebepti karantin talaptaryn saqtaýymyz qajet», - deidi sanitariialyq dáriger.
Karantin talaptarynyń saqtalýyn óńirde monitoringtik toptar qadaǵalaýǵa alǵan. Osy aralyqqa deiin 1261 ákimshilik hattama toltyrylǵan. Onyń 1158-i qoǵamdyq oryndarda maska taqpaǵan jeke tulǵalarǵa qatysty. Jalpy salynǵan aiyppuldyń mólsheri – 71 mln teńgeden asady. Búginde departamentte tártip saqshylarynan túsken 400-ge jýyq is qaralyp jatyr.
