Soltústik Qazaqstan oblysyna ońtústiktegi «jumys kúshi artyq» oblystardan mamandardy tartý baǵdarlamasy aiasynda kóship kelýshilerge 2020 jylǵa deiin 2100 turǵyn úi salynady, dep habarlaidy "Ult aqparat".
SQO jumyspen qamtýdy úilestirý jáne áleýmettik baǵdarlamalar basqarmasynyń málimetinshe, sońǵy úsh jylda Qyzyljar óńirine jumys kúshi artylǵan óńirlerden 5 myńǵa jýyq adam – 1428 otbasy qonys aýdarǵan. Onyń ishinde 725 úielmen biyl kelgender. Oblysqa osy jyly kóshkenderdiń 50%, iaǵni 1085 adam eńbekke jaramdy bolsa, solardyń 73% turaqty jumysqa ornalastyryldy.
«Oblysqa mamandar kerek. Qazir halyqtyń 19% zeinet jasyndaǵy adamdar. Bul – 103 myń adam. Óńir turǵyndary qartaiyp jatyr. Jumys berýshiler ózderine qajet mamandardy tabý úshin ońtústik oblystarǵa baryp, turǵyndarmen kezdesip, shaqyryp jatyr», - deidi SQO ákiminiń orynbasary Asqar Saqypkereev.
Kóship kelgenderdi jergilikti bilik jumysqa, balalaryn kezeksiz balabaqshaǵa ornalastyrady. «Kásip ashamyn, jer alyp, baý-baqshamen ainalysamyn» degenderge de bar jaǵdai jasalady. Jer ýchaskeleri berilip, granttar úlestirilip jatyr. Qonys aýdarýshylardyń basty máselesi – turǵyn úi. Áleýmettik-ekonomikalyq damý keshendi jospary aiasynda óńirde qonys aýdarýshylarǵa baspana salý boiynsha pilottyq joba júzege asyrylyp jatyr. Biyl qolǵa alynǵan tyń bastama nátijesinde 428 úidiń qurylysy bastaldy. Bes úlgi boiynsha salynatyn baspanalardyń jalpy aýdany 90 sharshy metrge deiin bolmaq.
Oblystaǵy sharýashylyqtar da qarap qalmai, kóship kelgen mamandardy baspanamen qamtyp jatyr. Ǵ.Músirepov aýdanyndaǵy «Aqseleý» JShS basshysy Serik Malaev qonys aýdarýshylarǵa 10 úi salyp berdi. Gúlmira Joldaspaeva otbasymen birge jeti jyl Nur-Sultan qalasynda páter jaldap turǵan. Qazir jas maman mektepte aǵylshyn tilinen sabaq beredi.
«Aýylǵa kóship kelgenime esh ókinbeimin. Biyl qyrkúiek aiynda memlekettik baǵdarlamamen Kovylnoe aýylyna keldik. Eki balamyz bar. Kúieýim «Aqseleý» JShS jumys isteidi. Úiimiz jyly, jaily. Qaladan aýylǵa kóship kelgenime esh ókinbeimin», - deidi Gúlmira Joldaspaeva.
SQO-ǵa tek Nur-Sultan qalasynan ǵana biyl 100 otbasy qonys aýdarǵan. Óńirge kóship kelýshilerge tek pilottyq joba aiasynda ǵana 2022 jylǵa deiin 2100 baspana salynbaqshy.
