Soltústik Qazaqstan oblysynda densaýlyq saqtaý basqarmasy koronavirýspen kúreste qajet qorǵanysh kiimderin negizsiz qymbat baǵaǵa satyp alǵan, dep habarlaidy "Ult aqparat".
SQO sybailas jemqorlyqqa qarsy qyzmet densaýlyq saqtaýǵa qatysty úsh memlekettik uiymdy tekserip, sybailas jemqorlyq táýekelderine syrtqy taldaý júrgizdi.
Mundai taldaý jumysy barlyq óńirler boiynsha uiymdastyrylǵan. Nátijesi boiynsha respýblikalyq deńgeide shara qoldanylady.
«SQO densaýlyq saqtaý basqarmasyna, SQO sanitariialyq-epidemiologiialyq baqylaý departamenti men onyń Petropavldaǵy basqarmasynyń jumysyna taldaý júrgizildi. Jumys barysynda COVID-19-ben kúreske bólingen qarajattyń maqsatty jumsalýy, iaǵni jeke qorǵanysh quraldaryn, meditsinalyq jabdyqtardy tiimdi baǵaǵa jetkilikti túrde satyp alý jaǵdailary jáne meditsina qyzmetkerlerine ústemeaqy tóleýge bólingen biýdjettiń durys igerilýi tekserildi. Syrtqy taldaý barysynda birqatar olqylyq anyqtalyp, sybailas jemqorlyqqa jol beretin jaǵdailardy joiýǵa 41 usynys jasaldy», - deidi QR sybailas jemqorlyqqa qarsy is-qimyl agenttiginiń SQO boiynsha departament jetekshisi Jarqyn Ǵalymov.
Sybailas jemqorlyqqa qarsy qyzmet júrgizgen syrtqy taldaý nátijesinde sanitariialyq-epidemiologiialyq baqylaý departamentiniń jumysynda negizgi qaýipti aimaqtar anyqtaldy.
«Ákimshilik quqyqbuzýshylyq týraly Kodekstiń 425-baby 1-bólimin ámbebap dep aitýǵa bolady. Bul bapty azyq-túlik ónimin shyǵarýshylar tehnikalyq reglamentti jáne meditsinalyq mekemelerdiń, qoǵamdyq tamaqtaný oryndary men saýda ortalyqtarynyń jaýapty tulǵalary sanitarlyq talaptardy buzǵanda, al 2020 jyldyń jazynan qarapaiym turǵyndarǵa karantindik sharalardy buzǵany úshin qoldanylyp keledi», - deidi QR sybailas jemqorlyqqa qarsy is-qimyl agenttiginiń SQO boiynsha departamenttiń basqarma basshysy Damir Habibýlin.
Bul bapty buzǵandarǵa 30 AEK – 87 510 teńge aiyppul salynady. Maska taqpaǵany úshin osyndai úlken kólemde aiyppul tóleý otbasy biýdjetine aitarlyqtai salmaq salady. Aita ketetin taǵy bir jait, saýda ortalyqtarynda karantin talaptarynyń saqtalýyna jaýapty tulǵalarǵa maska taqpaǵany úshin jeke tulǵa retinde de dál sol kólemde aiyppul salynady eken.
«Sanitariialyq-epidemiologiialyq baqylaý departamentiniń qyzmetkerlerine ústemeaqy tóleýde olqylyqtar anyqtaldy. Koronavirýspen kúreske jumyldyrylmaǵan mamandar, iaǵni qujatpen jumys istegen qyzmetkerlerge ústemeaqy tólengen. Artyq tólengen qarajat – 500 myń teńgeden asady. Aqsha biýdjetke qaitaryldy», - deidi Damir Habibýlin.
Al jeke qorǵanysh kiimderin satyp alýda densaýlyq saqtaý basqarmasy biýdjet qarajatyn tiimsiz jumsaǵan. Tekseris barysynda mekemeniń kásipkerden qorǵanysh kiimderiniń bir danasyn 40 327 teńgege satyp alǵany anyqtaldy. Osylaisha 27 mln 664 myń teńgege 686 danasy alynǵan. Dál sol ýaqytta «SK-Farmatsiia» JShS 7020 kostiýmdi 165 mln 250 myń teńgege alǵan. Munda bir danasy 23 540 teńgege shyqqan. Basqarmaǵa 115 mln teńgeni únemdeýge bolar edi.
SQO densaýlyq saqtaý basqarmasy basshysynyń orynbasary Nurlan Aimanovtyń aitýynsha, ol ýaqytta elde tótenshe jaǵdai jariialanyp, satyp alýlardy erekshe tártippen júrgizýge týra kelgen eken.
