Soltústik Qazaqstan oblysynda qarjy piramidasyn uiymdastyrýshylar turǵyn úi kooperativiniń atyn jamylyp, azamattardyń qarajatyn alǵan, - dep habarlaidy Tengrinews.kz tilshisi qarjy monitoringi agenttigine silteme jasap.
Vedomstvonyń málimetinshe, uiym azamattardyń tabysyna qaramastan, turǵyn úi satyp alýǵa jalǵan kómek kórsetý maqsatynda qarjylyq qyzmetti júzege asyrǵan. Qarjy piramidasyn uiymdastyrýshylar áleýmettik jeliler men WhatsApp messendjeri arqyly "Shańyraq+" baǵdarlamasy aiasynda ipotekalyq qaryzǵa balama usyna otyryp, jeke tulǵalardy tartyp otyrǵan.
"Qarjy piramidalarynyń shemalarynyń biri - tutyný kooperativteri. Alaiaqtar turǵyn úi nemese avtokólik satyp alý baǵdarlamasyn usynady. Kóbinese, klýbqa kirý úshin múshelik jarna tóleý qajet, ol qaitarylmaidy. Bul rette múlik jańa salymshylardyń jarnalaryna satyp alynady", - dep atap ótti agenttikte.
Baǵdarlamaǵa qatysý úshin 103 dollar salyp, jańa salymshylardy shaqyrý qajet bolǵany aityldy.
"Tergeý áreketterin júrgizý barysynda kompaniia filialdarynan baspa ónimderi, býkletter, kompaniia qyzmeti týraly aqparaty bar broshiýralar, sharttar, tizimder jáne salymshylar boiynsha aqparat anyqtalyp, tárkilendi. Bul iske qatysty sotqa deiingi tergep-tekserý jumystary bastaldy. Tergeý múddesine orai ózge aqparat jariia etilmeidi", - delingen habarlamada.
Sondai-aq, qarjy monitoringi agenttigi azamattardan tanystary nemese jaqyndary osyndai piramidaǵa tartylǵan bolsa, dereý +7 (7172) 708-478 senim telefony arqyly nemese aýmaqtyq qarjy monitoring organdaryna habarlasýlaryn surady.
