Foto: qyzyljartv
Soltústik Qazaqstan oblysynyń týmasy soǵys ardageri Vasilii Vasilevich Makienko ómirden ótti, dep habarlaidy SQO ákimdigi.
Vasilii Vasilevich 1926 jyly 24 qańtarda Voloshinka aýylynda dúniege kelgen. 1943 jyly 17 jasynda áskerge shaqyrylyp, 44-shi jáne 142-shi atqyshtar polkinde, keiin 317-shi gvardiialyq atqyshtar polkinde qyzmet etti. Kórsetken erligi men batyrlyǵy úshin II dárejeli Otan soǵysy ordenimen jáne medaldarmen marapattaldy.
Soǵystan keiin beibit eńbekke belsene aralasyp, óńirdiń damýyna eleýli úles qosty. Sý sharýashylyǵy salasynda eńbek etip, tehnikalyq jabdyqtaý óndirisi basqarmasy bastyǵynyń orynbasary qyzmetin 13 jyl atqardy.
"Bizdiń ardagerimiz ómirge qushtar, belsendi jáne salaýatty ómir saltyn ustanǵan, jas urpaqqa rýhtyń myqtylyǵy men naǵyz patriotizmniń jarqyn úlgisi boldy. Ótken jyly ol óńir turǵyndarymen birge Máńgilik alaýǵa gúl shoqtaryn qoiý rásimine qatysqan sát barsha soltústikqazaqstandyqtar úshin erekshe áserli boldy. Keler jyly ol 100 jasqa tolar edi. Maidangerdiń erligi men eńbegi, jarqyn beinesi jadymyzda máńgi saqtalady", - dep jazdy óńir basshysy Ǵaýez Nurmuhambetov áleýmettik jelide.
Qazirgi tańda Soltústik Qazaqstanda jalǵyz ǵana soǵys ardageri qaldy.
