Soltústik Qazaqstan oblysynda tek sońǵy eki jylda aiyp turaǵyna ózge elderdiń nómirleri bar 60 avtomobil qoiyldy, dep habarlaidy QazAqparat.
SQO politsiia departamenti baspasóz qyzmetiniń málimetinshe, aiyp turaǵyna qoiylǵan kólikterdiń jeteýi – Reseiden aidap áketilgen kólikter tiziminde bolǵan. Keibir kólikterge shetelde shekteý qoiylǵandyqtan aiyp turaǵynda tur. Mysaly, «BMW X-5» kóliginiń naqty iesine Reseide múlik tyiymy salynǵandyqtan, tamyz aiynda Petropavl turǵyny kóliginen aiyryldy jáne mundai oqiǵalar jii kezdesip te jatyr.
«Sonymen qatar, aiyp turaǵyna Qazaqstan Respýblikasynyń memlekettik shekarasynda toqtatylǵan kólikter qoiylady. Bul kólikter zańnamany buza otyryp resimdelgen. Olardyń kóbisin jalǵan qujattarmen kirgizbekshi bolǵan, keibireýiniń vin-kody qaita soǵylǵan. Jerlesterimizdiń birazy shetelde «uqsasy» bar kólikti tizgindep júr deýge negiz bar», - deidi SQO PD anyqtaý basqarmasy bastyǵynyń orynbasary Jeńis Temirbekov.
Kelesi bir qaýip qazaqstandyqtar «konstrýktor» dep atap ketken kólikterge qatysty. Kúrdeli jol-kólik oqiǵasynan keiin avtomashinalardyń qosalqy bólshekterinen kólik qurastyrylyp, satylady. Olardy da jalǵan qujattar boiynsha satady. Politseiler shetel kóligin satyp alar kezde avtomobilderdiń jáne agregattardyń (vin-kod, shanaq, qozǵaltqysh, shassi jáne t.b.) sáikestendirý nómirlerin tirkeý qujattarynda kórsetilgen málimettermen salystyrýǵa, shekteýler qoiylǵanyn, ne qoiylmaǵanyn, jalpy tarihyn tekserýge keńes beredi.
Jalpy SQO-da tek ońǵy eki jylda sheteldik nómirleri bar 60 avtokólik aiyp turaqtaryna qoiyldy.
