Soltústik Qazaqstan oblysynda búginnen bastap koronavirýsqa qarsy Pfizer kompaniiasynyń vaktsinasy egilip jatyr. Ázirge 20 jýyq adam ǵana ekpe aldy, dep habarlaidy QazAqparat.
SQO densaýlyq saqtaý basqarmasy baspasóz qyzmetiniń málimetinshe, Pfizer kompaniiasynyń vaktsinasy búgin alǵash ret Petropavldaǵy ekinshi jáne úshinshi qalalyq emhanada arnaiy ashylǵan ekpe pýnktterinde qoiyldy. Preparat birinshi kezekte 16-18 jastaǵy jasósipirimderge jáne júkti kelinshekter men bala emizetin áielderge egilip jatyr. Oblys ortalyǵynyń turǵyny Alena Stadnik qyzy Valeriiany ertip ákelgen.
«Qyzym Valeriia «Daryn» mektep-litseiiniń 11 synybynda oqidy. Sabaqtan tys ýaqytta balalarmen saýda úilerine, kinoteatrlarǵa barady. Qoǵamdyq oryndarda júretindikten onyń densaýlyǵyna alańdaimyn. Bala kezinen barlyq qajetti ekpelerdi saldyryp kelemiz. Bul preparat qaýipti infektsiiadan qorǵanýǵa sep bolady dep esepteimin», - deidi qala turǵyny.
Alǵashqylardyń biri bolyp vaktsina alýǵa kelgenderdiń qatarynda petropavldyq Nuraiym Qaparova da bar.
«Otbasymnyń barlyq músheleri koronavirýsqa qarsy ekpe aldy. Sondyqtan júkti áielderge de vaktsina qoiylatyndyǵyn estigende qýandym. Pfizer vaktsinasynyń oblysqa kelgenin kúttim. Qazir men ózim úshin ǵana emes, sharanam úshin de jaýaptymyn», - deidi Nuraiym Qaparova.
Eki komponentti Pfizer-diń bir ampýlasy 6 dozadan turady. Vaktsinatsiianyń birinshi kúni eki emhanada 18 adam ǵana ekpe aldy.
