Soltústik Qazaqstan oblysynda mamandar kóktemgi sý tasqynyn baqylaýda ustap otyr. Búgin Timiriazev aýdanyna jaǵdaidy retteýge qutqarýshylardan quralǵan arnaiy top attanady, dep habarlaidy "Ult aqparat".
SQO tótenshe jaǵdailar departamentiniń bastyǵy Ramil Kamalovtyń aitýynsha, Sergeev sý qoimasynan asyp-tógilý 54 sm qurap otyr. Bul bógen rettelmeidi. Iaǵni sý qoimasynan ótken sý tómen aǵyspen ketip, Petropavlǵa, odan Reseidiń Túmen oblysyna barady. Úlken sý Petropavlǵa 10 kún shamasynda jetpek.
«Shaǵyn ózenderdegi sý deńgeii birer kúnnen keiin tómen túse bastaidy. Sol sebepti qazir negizinen Esil ózenin Sergeev sý qoimasynan bastap baqylaýǵa alamyz.
Aqmola oblysynan keletin Chaglinka, Sileti ózenderinen de qaýip joǵary. Sondai-aq Esilge quiatyn Kolýton men Jabai ózenderine de kúndelikti monitoring júrgiziledi», - deidi Ramil Kamalov.
Ótken táýlikte Aiyrtaý, Esil jáne Shal aqyn aýdandarynda respýblikalyq, oblystyq, aýdandyq mańyzdaǵy joldarda 6 ýchaskeni sý basty. Ekeýinde qazir jaǵdai turaqtaldy. Aýyl ishindegi joldardy sý basqanymen, úilerge sý kirgen joq.
Mamandar óńirdegi ózenderden basqa Úlken Torańǵuldy da nazarda ustap otyr. Kólge Qamysaqty ózeni quiady. Kól deńgeii birtindep kóterilip keledi.
«Sońǵy ret SQO-da 2017 jyly úlken sý tasqyny boldy. Biraq biyl qarqyny tómen. Esil ózenine quiatyn Kolýton men Jabai ózenderinde, máselen, sý deńgeii jyldaǵy ortasha kórsetkishten tómen. Sol sebepti qazirgi boljam boiynsha úlken sý tasqyny bolmaidy. Desek te, arqany keńge salmai, jaǵdaidy baqylaýǵa aldyq», - deidi departament bastyǵy.
Óńirdiń sý tasqyny qaýpi joǵary Ǵabit Músirepov, Aiyrtaý, Ýálihanov aýdandarynda qutqarýshylar men órt sóndirýshilerden quralǵan arnaiy top jumys istep jatyr. Búgin dál osyndai top Timiriazev aýdanyna attanbaq.
