Soltústik Qazaqstan oblysynda eńbek migranttaryna ruqsat berý jáne onyń merzimin sozý qujaty - sheteldikterdiń suranysyna ie memlekettik qyzmetterdiń biri, dep habarlaidy "Ult aqparat".
SQO Politsiia departamenti baspasóz qyzmetiniń málimetinshe, biyl óńirde Ortalyq Aziiadan kelgen 3 myńǵa jýyq azamat jumys tapqan. Migranttardyń basym bóligi – 1908 adam – Ózbekstannyń turǵyndary. Ázerbaijan men Tájikstannan jumys izdep keletinderdiń de sany az emes. Moldoviia men Grýziianyń azamattary da kóshi-qon qyzmetinde ruqsat alǵan. Politsiia qyzmetkerleriniń aitýynsha, sheteldik jumysshylar negizinen qurylys salasynda jumys isteidi jáne jóndeý jumystarymen ainalysady.
Óńirge kelgen eńbek migranttarynyń 341-i – áielder. Olar kóbine bala baǵýshy nemese úi qyzmetshisi bolyp ornalasady eken.
Jyl basynan kóshi-qon qyzmeti 230 myńǵa jýyq memlekettik qyzmet kórsetken. Olardyń basym bóligi QR azamattaryn turǵylyqty jeri boiynsha tirkeýge qatysty. Sondai-aq 63 myń soltústikqazaqstandyq kóshi-qon qyzmetine meken jai anyqtamasyn alý úshin kelgen. Taǵy 43 myń turǵynǵa tólqujat pen jeke bas kýáligi berilgen.
«Memleket basshysy Qasym-Jomart Toqaev óz Joldaýynda basym baǵyttardyń biri retinde memlekettik organdardyń turǵyndarmen tiimdi bailanysyn atap kórsetti. Bizdiń vedomstvoda kórsetiletin memlekettik qyzmetterdiń sapasyn arttyrýda únemi jumystar júrgiziledi. Sonyń biri – jumysty tsifrlyq formatqa kóshirý. Bul – jumysty jyldamdatyp, qoljetimdilikti arttyrady jáne sybailas jemqorlyqqa jol berilmeidi», - deidi SQO PD bastyǵynyń birinshi orynbasary Dýman Taev.
