Búgin Úkimet otyrysynda QR Aýyl sharýashylyǵy ministri Saparhan Omarov Soltústik Qazaqstan oblysyndaǵy agroónerkásiptik keshenniń áleýeti jaiynda baiandady, dep habarlaidy QazAqparat.
«Soltústik Qazaqstan oblysy agroónerkásiptik keshendi damytý boiynsha úlken áleýetke ie. Agroónerkásiptik keshendi damytýdyń memlekettik baǵdarlamasynda jáne Soltústik Qazaqstan oblysyn damytýdyń 2021 jylǵa deiingi keshendi josparynda kózdelgen sharalardyń arqasynda oblys úshin ótken jyl oń nátijeler kórsetti. Ósimdik sharýashylyǵyndaǵy ártaraptandyrý aiasynda sońǵy úsh jylda maily daqyldar alańy 1,3 esege ulǵaiyp, ótken jyly 922,6 myń gektardy qurady. Mashina-traktor parkin jańartý jónindegi mindet aiasynda 2020 jyly 2085 aýyl sharýashylyǵy tehnikasy satyp alyndy, bul 2018 jylǵydan 33,6 paiyzǵa kóp», - dedi ministr.
Onyń aitýynsha, mal sharýashylyǵynda úsh jyl ishinde qýaty 36 myń tonna sútti quraityn jańa 12 sút kesheni jáne 3 bordaqylaý alańy paidalanýǵa berildi. Taiynsha et kombinatyna jańǵyrtý júrgizildi, sondai-aq «BioOperations» JShS zákirlik kásipornymen astyq óndirý jáne óńdeý jónindegi ekojúie qurylýda.
«Nátijesinde oblystyń jalpy aýyl sharýashylyǵy óniminiń kólemi ótken jyly 779 mlrd teńgeni qurady. Bul – jalpy respýblikalyq kólemde óńirler arasynda ekinshi oryn, al aýyl sharýashylyǵyna quiylǵan investitsiialar kólemi boiynsha óńir birinshi orynda. Alaida, bul aýyl sharýashylyǵy boiynsha aitarlyqtai serpilis jasaý úshin jetkiliksiz», - dedi S. Omarov.
Aita keteiik, búgin Úkimet otyrysynda QR Ulttyq ekonomika ministri Áset Erǵaliev Soltústik Qazaqstan oblysynyń 2021-2025 jyldarǵa arnalǵan áleýmettik-ekonomikalyq damýynyń keshendi josparyn tanystyrdy. Premer-Ministr Asqar Mamin jospar óńirdiń infraqurylymyn jaqsartatynyn atap ótti.
