Soltústik Qazaqstan oblysy Ýálihanov aýdanyndaǵy Mortyq aýylynda qara mal áli kúnge deiin qyrylyp jatyr, dep habarlaidy QazAqparat.
Mortyq aýylynyń turǵyny Buidamhan Ábdikerimniń sońǵy úsh aida 6 buzaýy ólgen. Sońǵysy 14 qazan kúni aram óldi.
«Aýyrǵan mal isinedi, iskeni sondai, jarylady. Ádette qarasan aýrýynda osylai bolady. Bul qarasan aýrýy ekenin veterinarlar da aityp jatyr. Kóktemde vaktsina egilgen joq. Sondyqtan bul aýrý basylar emes», - deidi aýyl turǵyny.
Buǵan deiin shilde aiynda osy aýylda 7 buzaýdyń óleksesi tabylǵanyn aitqan edik.
Ol joly aýylda barlyǵy 13 buzaý qyryldy. Zerthanalyq zertteýlerdiń kómegimen maldyń virýstyq diareia jáne infektsiialyq rinotraheitten ólgendigi anyqtaldy.
Maldyń jańadan ólýine bailanysty veterinariia basqarmasy túsinik berdi.
«14 qazan kúni Ýálihanov aýdany Mortyq aýylynyń turǵyny óz aýlasynda buzaýdyń ólgeni týraly habarlady. Oqiǵa ornyna aýdandyq veterinariialyq qyzmet keldi. Ólekseni tekserý barysynda artqy aiaqtarynyń isinýi baiqaldy. Klinikalyq belgileri emkar aýrýyna uqsas. Dál diagnoz qoiý úshin zerthanalyq saraptama qajet. Patologiialyq materialdar iriktelip alynyp, Nur-sultan qalasynyń veterinariia jónindegi ulttyq referenttik ortalyǵyna jiberildi. Mortyq aýylynda barlyq janýarlar baqylaýǵa alyndy, aýrý men ólimniń jańa jaǵdailary tirkelgen joq», - deidi basqarma mamandary.
Janýarlardy vaktsinalaý, úi-jailardy dezinfektsiialaý júrgiziledi.
«16 qazanda aýdannyń veterinariialyq qyzmeti mal óleksesin mal qorymyna aparyp jaqty, ólgen orny dezinfektsiialandy. Ólgen mal talap boiynsha tez arada joiylýy kerek edi. Veterinariia basqarmasy atalǵan fakti boiynsha oqiǵa ornyna baryp qyzmettik tergeý bastady, onyń nátijeleri boiynsha kináli tulǵalarǵa qatysty tiisti sharalar qabyldanatyn bolady», - deidi basqarmadaǵylar.
