Soltústik Qazaqstan oblysynda politseiler «Astyq» jedel-profilaktikalyq is-sharasy aiasynda qyrman basynda jasalǵan urlyqty ashty, dep habarlaidy QazAqparat.
SQO politsiia departamenti baspasóz qyzmetiniń málimetinshe, Taiynsha aýdanynyń politsiia bólimi qyzmetkerleri «Astyq» jedel-profilaktikalyq is-sharasy barysynda Mnogotsvetnoe eldi mekenindegi qyrmannan jasymyq urlady degen kúdikpen aýdan ortalyǵy Taiynshanyń turǵyndaryn ustady. Aýyl turǵyndary osyndai birneshe urlyqqa qatysty bolýy múmkin.
Birer kún buryn aýdan ortalyǵy Taiynshadan 15 shaqyrym qashyqtyqta ornalasqan Mnogotsvetnoe aýyly mańyndaǵy kásiporyndardyń birinen jumysshylar 4 tonna jasymyqtyń urlanǵanyn baiqaǵan. Bul fakti týraly politseilerge habarlanady.
Taiynsha aýdany politsiia bólimi bastyǵy Nurlyjan Aqtanovtyń sózinshe, urlyq qyrkúiek boiy jasalyp kelgen. Jedel-izdestirý is-sharalary nátijesinde kúdiktiler anyqtalyp, ustaldy. Olar osy tokta jumys isteitin Taiynshanyń eki turǵyny bolyp shyqty. Urlanǵan jasymyqtyń jalpy salmaǵy 40 tonna, shyǵyn somasy 11 mln teńge shamasynda.
Jasymyqty qyrmannan shyǵarýǵa bes tehnika - 2 KamAZ, 2 ZIL jáne júk tiegish paidalanylǵan. Qazirgi ýaqytta tehnikany júrgizgen eki jumysshynyń qylmysqa qatystylyǵy tekserilip jatyr. Urlanǵan ónim osy aýdandaǵy aýyldardyń birine ótkizilip otyrǵan. Jasymyqtyń bir bóligi alyndy.
Atalǵan fakti sotqa deiingi tergep-tekserýlerdiń biryńǵai tizilimine engizildi. Ustalǵandardyń ekeýi ýaqytsha ustaý izoliatoryna qamaldy. Tergeý amaldary júrgizilip jatyr.
