Soltústik Qazaqstan oblysynda koronavirýs juqtyrǵan alǵashqy naýqas emdelip shyqty. Bul jaiynda búgin óńirlik kommýnikatsiialar qyzmetinde densaýlyq saqtaý basqarmasynyń jetekshisi Timýr Sultanǵaziev aitty, dep habarlaidy "Ult aqparat".
Juqpaly indetten táýir bolǵan - Petropavl qalasynyń turǵyny. Endi ol 14 kún dárigerlerdiń baqylaýyna alynyp, úi karantininde otyrady.
«Búginde infektsiialyq statsionarda 24 adam jatyr. Olardyń jaǵdailary jaqsy. Aýrýdyń klinikalyq belgileri joq, dene qyzýy qalypty. Juqtyrǵandardyń basym bóligi infektsiiany tasymaldaýshy, sol sebepti jaǵdailary qalypty. Emdeý hattamasyna sai emdik is-sharalar júrgizilip jatyr», - dedi Timýr Sultanǵaziev.
Budan basqa provizorlyq statsionarda 68 adam jatyr. Olar jedel respiratorlyq virýstyq infektsiia belgilerimen túskender, biraq olarda koronavirýs infektsiiasy anyqtalmaǵan. Karantindik statsionarlarda 230 adam bar. Olardyń basym bóligi – juqpaly indetti juqtyrǵandarmen jaqyn qarym-qatynasta bolǵandar. Úi karantininde 1137 adam otyrsa, dárigerler taǵy 266 adamdy qashyqtan baqylaýǵa alǵan.
«Qosymsha taǵy 10 reanimatsiialyq oryn ázirledik. Eksperttik klassqa jatatyn 5 jasandy tynys alý apparaty alyndy. Bul jumystar jaǵdaiy aýyr naýqastar túsetin bolsa aldyn ala daiyn otyrý úshin atqaryldy», - dedi Timýr Sultanǵaziev.
