Soltústik Qazaqstan oblysynda biyl qys qalyptan tys jyly jáne qarly boldy, dep habarlaidy "Ult aqparat".
«Qazgidromet» RMK SQOF málimetinshe, mamandar óńirdegi 19 gidrologiialyq beketten monitoring júrgizedi. Jaqynda olar kóktemgi sý tasqyny boiynsha memlekettik organdar men ákimdikterge aldyn ala konsýltativtik gidrologiialyq boljamdy jasap berdi.
Biyl SQO-da qar molynan jaýdy. Qazirgi ýaqytta sinoptikter aýdandardaǵy qardyń qalyńdyǵyn ólshep, taldaý jasap jatyr. Ásirese Ǵ.Músirepov, Aiyrtaý aýdandarynda jaǵdai kúrdeli, munda kóp mólsher tirkelgen. Ótken aimen salystyrǵanda qardyń qalyńdyǵy 1,5 esege artsa, bul ótken jylǵy kórsetkishten 4 ese kóp.
«Biyl qardyń kóptiginen SQO, ShQO, Qaraǵandy, Aqmola jáne Qostanai oblystarynda sý tasidy dep kútilýde. Qazir óńirdegi Sergeev sý qoimasynda 660 mln tekshe metr sý bar, iaǵni 95 % tolǵan. Bul 2017 jylǵy kórsetkishke teń», - deidi «Qazgidromet» RMK SQOF direktory Qymbat Merǵalimova.
Biyl qystyń qalyptan tys jyly bolýyna bailanysty birneshe ózende sýdaǵy muz qozǵala bastaǵan. Esil ózenindegi muzdyń qalyńdyǵy qazir 15-30 sm aralyǵynda ǵana. Bul byltyrǵydan shamamen 3 ese az.
«Naýryz aiynyń ortasha temperatýrasy minýs 6-8 aralyǵynda bolady dep kútilýde. Bul ádettegi normadan 1 gradýsqa joǵary. Aidyń basynda qar jaýsa, orta shenine qarai qardyń arty jańbyrǵa ulasady. Naýryzdyń ekinshi on kúndiginde aýa temperatýrasy aitarlyqtai jylyp, qar qarqyndy túrde eri bastaidy», - deidi Qymbat Merǵalimova.
