Petropavl qalalyq soty halyqty jumyspen qamtý ortalyǵynyń burynǵy direktory men onyń eki sybailasyna qatysty úkim shyǵardy, dep habarlaidy QazAqparat.
Petropavl qalalyq sotynyń málimetinshe, oblys ortalyǵyndaǵy halyqty jumyspen qamtý ortalyǵynyń direktory senimdi adamdary arqyly birneshe ret para alǵan.
Sottalýshy, halyqty jumyspen qamtý ortalyǵynyń direktory memlekettik baǵdarlamany júzege asyrý barysynda, sybailastary arqyly jeke tulǵalardan olarǵa jalǵa beriletin páterlerdi bergeni úshin syiaqy alyp kelgen.
Prokýror sottalýshyny tiisti organdarda qyzmet atqarý quqyǵynan ómir boiyna aiyra otyryp, 10 jylǵa bas bostandyǵynan aiyrýǵa, onyń sybailastaryna da 10 jylǵa bas bostandyǵynan aiyrý túrindegi jaza taǵaiyndaýdy surady.
Sottalýshylar kinálaryn moiyndamady jáne olar óz áreketterinde qylmystyq quqyq buzýshylyqtyń bolmaǵany úshin aqtaýdy surady.
«Birneshe ret úlken mólsherde para alǵandarǵa aiyppul nemese 7 jyldan 12 jylǵa deiingi merzimge bas bostandyǵynan aiyrý túrindegi jaza qarastyrylǵan. Sottalýshylar buryn isti bolmaǵan, bul olardyń jazasyn jeńildetetin jaǵdai retinde alyndy. Sondai-aq, sybailas retinde jaýapqa tartylǵandardyń birinde jas balasy bar. Osynyń bárin negizge ala otyra sot jumyspen qamtý ortalyǵynyń eks-direktoryn 8 jylǵa bas bostandyǵynan jáne ómir boiyna memlekettik qyzmette qyzmet atqarý quqyǵynan aiyrdy. Al onyń sybailastaryna 7 jylǵa bas bostandyǵynan aiyrý jazasy kesildi. Olardyń árqaisysy jazasyn ortasha qaýipsizdik mekemesinde ótep, 5 jylǵa memlekettik qyzmette qyzmet atqarý quqyǵynan aiyryldy», - delingen Petropavl qalalyq soty taratqan habarlamada.
