Soltústik Qazaqstan oblysynda kómirge suranys artty. Biyl turǵyndar byltyrǵydai otynsyz qalmaý úshin erte bastan qimyldap jatyr. Ázirge baǵa burynǵydai, tek Qarajyra kómiri ǵana myń teńgege qymbattady, dep habarlaidy QazAqparat.
SQO energetika jáne turǵyn úi-kommýnaldyq sharýashylyǵy basqarmasynyń málimetinshe, óńirde kómir jetkiziletin 32 temirjol tuiyǵy bar.
Qazirgi ýaqytta ol jerde 17 myń tonna, sonyń ishinde Petropavlda 1,5 myń tonna kómir jatyr.
Máselen Jumysshy kentindegi myna tuiyqqa táýligine 10 vagon qatynaidy.
Ony kúndelikti tańǵy saǵat 6.00-den bastap kezekke turǵan júk kólikteri bir túiirin qaldyrmai bólip áketedi eken.
«Qysqa daiyndalý eki ai buryn bastaldy. Byltyr osy merzimge Petropavl turǵyndary 3,5 myń tonna ǵana kómir satyp alsa, biyl 10 myń tonnadan astamy satyldy. Tamyz, qyrkúiekte ai saiyn 15 myń tonnadan ákelinip otyrady, tapsyrys berdik. Jolda qazir taǵy 2,5 myń tonna kómir kele jatyr. Jaǵdaidy baqylaýda ustap otyrmyz», - deidi basqarma basshysy Baqyt Iliiasov.
Keide kómir tielgen vagondar ýaqytynda kelmei jatady. Oǵan temirjoldarda jóndeý jumystarynyń júrgizilýi sebep.
«Turǵyndardy ótken jylǵydai jaǵdai qaitalanbaýy úshin otyn-kómirdi erte bastan daiyndaýǵa shaqyramyn. Óitkeni kúzde qaitadan dúrlikpe týyndaýy múmkin. Kómirdiń tonnasy 14-17 myń teńge aralyǵynda, bul byltyrǵy baǵa. Tek Qarajyra kómiri ǵana 1 myń teńgege qymbattady. Biraq kúzde qara otynnyń baǵasy ósedi dep oilaimyz», - deidi Baqyt Iliiasov.
Mamannyń aitýynsha, byltyr kómirdiń qat taýarǵa ainalýyna birneshe sebep boldy. Sonyń biri – vagondardyń jetispeýshiligi.
Ekinshisi – kómirge suranystyń kúrt artýy, turǵyndar jaz boiy arqany keńge salyp, tek kún sýytqasyn ǵana ony ala bastady.
Biyl mundai jaǵdai qaitalanbaýy tiis, óitkeni halyqtyń tarapynan suranys kúnnen kúnge artyp keledi.
Jalpy SQO turǵyndary qystan qysylmai ótýi úshin jylytý maýsymyna 410 myń tonna kerek eken.
