Foto: Mádeniet jáne aqparat ministrliginiń baspasóz qyzmeti
Keshe Soltústik Qazaqstan oblysynda qazaq kinosynyń kúnderi bastaldy. Basty maqsat - kópshilikti daryndy jerles rejisserlermen jáne olardyń kartinalarymen tanystyrý. Dál osy filmder el mádenietin ashyp kórsetedi, dep habarlaidy Mádeniet jáne aqparat ministrliginiń baspasóz qyzmeti.
Kóptegen kartinalar memleket tarihyndaǵy negizgi kezeńderdi baiandap, kórnekti qoǵam qairatkerleriniń ómiri men qyzmetin tanystyrady.
«Qazirgi ýaqytta Mádeniet jáne aqparat ministri Aida Ǵalymqyzy Balaeva otandyq kinony damytýǵa erekshe kóńil bólýde. Biz ortalyqtyń qoldaýymen túsirilgen barlyq jobanyń kórermenge jetýin qalaimyz. Oblys ortalyǵynda ǵana emes, aýdandarda, aýyldarda da bul baǵyttaǵy jumysty turaqty negizde júrgizetin bolamyz», – dedi Ulttyq kinonyqoldaý memlekettik ortalyǵy KEAQ Basqarma tóraǵasy Qurmanbek Jumaǵali.
Sonymen qatar Ulttyq kinony qoldaý ortalyǵy respýblikalyq qana emes, óńirlik telearnalarmen de belsendi árýptestik ornatqan. Soltústik Qazaqstan telearnalarynda otandyq filmder úzbei kórsetilip júr. Qazaq kinosynyń onkúndigi aiasynda «Qyzyljar» Creative Center» ortalyǵynda «Pervyi Severnyi» telearnasymen yntymaqtastyq memorandýmyna da qol qoiyldy.
Otandyq kino onkúndiginiń birinshi kúni kórermenderge rejisser Serikbol Ótepbergenovtyń «Patriottar ýaqyty» filmi kórsetildi. Bul - terrorizmge qarsy kúres pen otbasylyq qundylyqtar týraly ekshn-film.
Kinokartinanyń siýjeti eki aǵaiyndy arasynda órbidi. Úlkeni barlaý qyzmetinde, al kishisi joiǵysh-ushqysh bolyp qyzmet etedi. Olardyń ákesi shaiqasta qaza tapqan. Ony eske alý jáne áskerdegi qyzmet – aǵaiyndylardy biriktiretin jalǵyz dúnie.
Onkúndiktiń ashylý saltanatyna SQO ákimi apparatynyń basshysy Rýslan Álishev qatysty. Ol óńir ákiminiń atynan qatysýshylardy quttyqtap, otandyq kinematografiiany nasihattaý jónindegi jumystyń mańyzyn atap ótti.
Kino kúnderi aiasynda ártúrli janrdaǵy filmder usynylmaq. Jekelei jiktesek, «Jambyl. Jańa dáýir», «Dos-Muqasan» arqyly tulǵalarymyzdyń júrip ótken jolyna qanyǵýǵa bolady. Al «Baýyryna salý» dep atalatyn kinoda dástúrimiz dáriptelip, ultqa degen súiispenshilik sezimi eselenbek. Kishkentai kórermenderge «Taiqazan» dep atalatyn animatsiialyq týyndy kórsetiledi.
Aita keteiik, buǵan deiin Kino ortalyǵynyń qoldaýymen 117 kartinanyń óndirisi aiaqtaldy. Onyń 72-si – kórkem, 37-si – derekti, 8-i – animatsiialyq filmder.
