Soltústik Qazaqstan oblysyndaǵy Kondratovka eldi mekeninde astyq qabyldaý pýnktinde órt shyǵyp, qapqa salynǵan 748 tonna un, 20 tonna kebek jáne aiyrly júk tiegish janyp ketti, dep habarlaidy "Ult aqparat".
SQO tótenshe jaǵdailar departamenti baspasóz qyzmetiniń málimetinshe, 12 maýsym kúni saǵat 5.36 minýt ketkende órt sóndirý qyzmetine Qyzyljar aýdanyndaǵy Kondratovka eldi mekenindegi astyq qabyldaý pýnkti aýmaǵynyń janyp jatqandyǵy jóninde habar túsedi.
Órt «Nur kompaniia Astyq LTD» JShS qoimalarynyń birinde shyqqan. Jalynmen kúreske Qyzyljar aýdanynyń jáne Petropavldyń mamandary men tehnikasy jumyldyrylady. Alaida olardyń oqiǵa ornyna jyldam jetýine joldyń nasharlyǵy kedergi bolǵan.
Órt sóndirýshiler jetkende sektsiialyq úlgidegi qoima lapyldap janyp, qasyndaǵy qalǵan nysandarǵa taralý qaýpi bolǵan.
Jalyndy aýyzdyqtaýmen órt sóndirý qyzmetiniń 40 mamany jáne 11 tehnika, sondai-aq kásiporynnyń erikti órt sóndirý qurylymynyń 3 mamany men 1 tehnika ainalysty. Órtti úsh jerden sóndirýge týra keldi. Joǵary temperatýra men kók tútin olardyń jumysyn qiyndata tústi. Tek tańǵy saǵat 10.07 minýt ketkende ǵana órt tolyq sóndirildi.
Mamandardyń aitýynsha, 1100 sharshy metr aýmaqtyń shatyry zaqymdandy. Qaptarǵa salynǵan 748 tonna un, 20 tonna kebek jáne aiyrly júk tiegish janyp ketti. Al jaqyn mańdaǵy qoimalar men diirmen kesheniniń ǵimaraty aman qaldy.
Qaza tapqandar men zardap shekkender joq. Qazirgi tańda órttiń shyǵý sebebi jáne kelgen shyǵyn mólsheri anyqtalyp jatyr.
