Soltústik Qazaqstan oblysynda tártip saqshylary avtokólikke jol bermeitin júrgizýshilerdi anyqtaý boiynsha reid ótkizip, 3 júrgizýshige ákimshilik hattama toltyrdy, dep habarlaidy QazAqparat.
SQO politsiia departamenti baspasóz qyzmetiniń málimetinshe, kólik júrgizýshileriniń basym bóligi shaqyrtýǵa asyǵyp bara jatqan arnaiy qyzmetterdiń mashinalaryn ótkizip jiberýge tyrysady.
Óitkeni jedel járdem, órt sóndirý, qutqarý, politsiia – adam ómirine arasha túsetin qyzmetter úshin árbir minýt mańyzdy.
Biraq, arnaiy jaryq jáne dybys signaldaryn iske qosyp, asyqqan mundai kólikterdi ótkizbeitinder de bar. Olar reid barysynda anyqtalyp, ákimshilik jaýapkershilikke tartyldy.
«Arnaiy kólikterdiń qozǵalysyna basymdyq bermegen júrgizýshiler jazalandy. Reid barysynda bul júrgizýshilerdiń jol qozǵalysy erejelerin bilmeitindigi anyqtaldy. QR jol qozǵalysy erejesiniń 6-taraýyna sáikes, jedel jáne arnaiy qyzmettiń kólik quraldarynyń júrgizýshileri kezek kúttirmeitin qyzmettik tapsyrmany oryndaýy kezinde, qozǵalystyń basqa qatysýshylary aldynda basymdyqqa ie. Biraq olar ózderine jol berilgendigine kóz jetkizgennen keiin ǵana basymdyqty paidalana alady. Jarqyldaq maiagi iske qosylǵan jáne arnaýly dybystyq signaly bar kólik quraldary jaqyndaǵan kezde júrgizýshiler kedergisiz ótip ketýin qamtamasyz etý úshin joldy bosatýy tiis», - deidi Petropavl qalalyq politsiia basqarmasy patrýldik politsiia batalony shtabynyń bastyǵy Oksana Popova.
Esterińizge sala keteiik, ótken aptada meditsinalyq qyzmettiń «Niva» markaly kóligi Jambyl-Ǵabit Músirepov kósheleriniń qiylysynda Volkswagen kóligimen soqtyǵysty.
Osyndai jol apatynyń aldyn alý maqsatynda patrýl politseileri únemi reidt ótkizip turady.
Osy joly bir saǵat ishinde tártip saqshylary «Arnaiy jaryq jáne dybys signaldary iske qosylǵan jedel jáne arnaiy qyzmetter kólik quralynyń júrýine basymdyq bermeý» babyn buzýdyń birden úsh deregin anyqtady.
Jalpy jyl basynan oblys joldarynda jedel jáne arnaiy qyzmet kólikterine jol bermeýdiń 15 deregi anyqtaldy.
