Petropavlda tamyz aiynyń sońynda úiinen saiajaiǵa shyǵyp ketken áiel búginge deiin tabylmai jatyr, dep habarlaidy "Ult aqparat" .
Soltústik Qazaqstan oblysy Politsiia departamenti baspasóz qyzmetiniń málimetinshe, Petropavl turǵyny Nadejda Mihailovna Agafonova 1939 jyly týǵan. Ol 28 tamyzda tańerteńgi saǵat 8.00 shamasynda úiinen «Jigýli» saiajai qoǵamynda ornalasqan saiajaiyna barmaqshy bolyp shyqqan. Sodan ushty-kúili joq.
Keiýana umytshaqtyq aýrýymen aýyrady. Dene bitimi aryqsha kelgen, boiy shamamen 160-165 sm, shashy aqshyl qysqa, kózi kók. Sol kúni ústinde qara shalbar, uzyn kúreń qyzyl kúrte, qońyr etik, basynda kók oramal bolǵan.
Joǵalǵan adamdardy izdeýmen kriminaldyq politsiia qyzmeti ainalysady. Tek Petropavl qalasynda jyl basynan beri iz-tússiz joǵalǵan 27 azamatqa izdeý jariialandy. Olardyń 26-nyń júrgen jeri anyqtaldy. Al 28 tamyzda joǵalǵan zeinetker Nadejda Agafonova tabylmaǵandardyń qatarynda.
Baǵdarlar politsiia bólimsheleriniń kezekshi bólimderine ǵana ilinip qoimai, Politsiia departamentiniń áleýmettik jelilerdegi resmi paraqshalarynda da jariialandy.
Jalpy 11 ai ishinde SQO politseileri joǵalǵan 90 adamǵa izdeý jariialady, onyń 67-si tabyldy. Sonymen qatar tártip saqshylary volonterlerdiń kómegimen izdestirý isin bastamastan 260-tan astam adamdy, iaǵni olar joǵalǵan bir táýliktiń ishinde izdep tapty.
