Qazaqstan Respýblikasy Premer-Ministriniń birinshi orynbasary Roman Skliar men Qazaqstanda jumys isteitin nemis biznesiniń jetekshileri kezdesti, dep habarlaidy "Ult aqparat" Úkimettiń resmi saityna silteme jasap.
Onda birlesken investitsiialyq jobalardy iske asyrý barysy men Qazaqstan-Germaniia ekonomikalyq yntymaqtastyǵyn odan ári keńeitý josparlary talqylandy. Sharaǵa Linde Gas, SIEMENS, Bayer, WILO Central Asia, Lufthansa Group jáne t.b. nemis kompaniialarynyń ókilderi qatysty.
Kezdesýde ekonomikanyń túrli salalary, atap aitqanda, mashina jasaý, metallýrgiia, energetika, taý-ken metallýrgiia kesheni máseleleri talqylandy.
Nemis áriptester álemdik naryqtyń turaqsyzdyǵy jaǵdaiynda Qazaqstan biznesti damytý jáne jańa investitsiialar úshin tartymdy elge ainalyp kele jatqanyn atap ótti.
Osylaisha, Germaniia ekonomikasynyń Ortalyq Aziiadaǵy ókildiginiń basshysy Hovsep Voskanian Qazaqstandaǵy iskerlik ahýaldyń qolaily deńgeiin, sonymen qatar nemis biznesi Qazaqstan Respýblikasynyń Prezidenti Qasym-Jomart Toqaev júrgizip jatqan institýtsionaldyq reformalardy qoldaitynyn aitty.
«Siemens» JShS bas direktory Dias Asanov kompaniia qazirdiń ózinde respýblikamyzda tsifrlyq transformatsiialaý boiynsha pilottyq jobalardy júzege asyryp jatqanyna toqtaldy. Bolashaqta Siemens kólik salasynda innovatsiialyq sheshimderdi engizý boiynsha infraqurylymdyq jáne tehnologiialyq áriptes retinde osyndai jobalarǵa qatysýǵa múddeli.
Óz kezeginde «Baier KAZ» JShS bas direktory Laýma Valtere Úkimettiń nazaryn jáne ashyq dialogqa árqashan daiyn ekenin atap ótti, bul biznes klimatty odan ári jaqsartýǵa yqpal etedi. Sondai-aq, ol jańa innovatsiialyq preparattardy sertifikattaý tetigin ózgertýdi usyndy.
Taý-ken metallýrgiia kesheni jobalaryn demonopolizatsiialaý máselelerin «thyssenkrupp Industrial Solutions» JShS bas direktory Roman Karl kóterdi. Kompaniia taý-ken, tsement jáne himiia ónerkásibindegi ónimder men qyzmetterdiń keń spektrin usynýǵa daiyn ekenin málimdedi.
Kelissózder taraptardyń odan ári ózara tiimdi yntymaqtastyqqa múddeliligi men daiyndyǵyn kórsetti.
