Úkimettiń keńeitilgen otyrysynan keiin Premer-Ministrdiń birinshi orynbasary Roman Skliar Ekibastuz jylý júiesindegi apattyń sebebi jóninde pikir bildirdi, dep habarlaidy QazAqparat.
«Shynymen de, bul - asa iri kommýnaldyq apat. Ekibastuzdyń tarihynda bolyp kórmegen shyǵar. Bul apatqa ne túrtki boldy degen suraq qoiylyp otyr. Stansadaǵy operatsiialyq personaldyń qateligi bar ekeni túsinikti. Jelidegi qysymdy kenet kóterip jibergen. Odan arǵy jerde báriniń, onyń ishinde menshik iesiniń de jaýapkershiligi bar. Nege olar osyǵan jol berdi? Stansa operatory monometrdegi kórsetkishke qarap qysymdy arttyrǵan. Al monometr bul kezde qatyp qalǵan. Óitkeni tereze synyq bolǵan. Sodan sýyq kirgen, monometr kádimgidei qatyp qalǵan», - dedi Roman Skliar.
Vitse-premerdiń aitýyna qaraǵanda, munyń ózi jylý-elektr ortalyǵyna ielik etip otyrǵan kompaniianyń jaýapkershiligi qandai deńgeide bolǵanyn kórsetedi.
«Nege olai boldy? Óitkeni kompaniia qarapaiym dúnielerge qarajatty jetkilikti mólsherde bólmegen shyǵar. Mamandardy jetkilikti deńgeide oqytpaǵan. Sondyqtan shartty túrde óshirgish tetikti buraǵan adam dep alsaq, sol ǵana jaýap beredi deý – qate. Quqyq qorǵaý organdary kinálilerdi taýyp, qatań jaýapqa tartady. Sondyqtan bul máselede shatasýdyń qajeti joq», - dedi Úkimet basshysynyń orynbasary.
