Elordada «SQ-Farmatsiia» JShS-nyń burynǵy basqarma tóraǵasy Berik Sháripke qatysty sot talqylaýy ótip jatyr, dep habarlaidy "Ult aqparat".
«SQ-Farmatsiia» JShS-nyń burynǵy basqarma tóraǵasy Berik Sháripke qatysty qylmystyq istiń basty sot talqylaýy Esil aýdanynyń №2 aýdandyq sotynda búgin bastaldy. Berik Sháripke QR QK-niń 361-babynyń (Laýazymdyq ókilettigin teris paidalaný) 4-bóligi 3-tarmaǵy, 287-babynyń (Qarýdy, oq-dárilerdi, jarylǵysh zattardy jáne jarylys qurylǵylaryn zańsyz iemdený, berý, ótkizý, saqtaý, tasymaldaý nemese alyp júrý) 2-bóligi boiynsha aiyp taǵylyp otyr», - dedi qalalyq sottyń baspasóz hatshysy Botagóz Baianova.
Aita keteiik, 361-babtyń 4-bóligi 3-tarmaǵynda aýyr saldarǵa alyp kelý, sondai-aq 287-baptyń 2-bóliginde jaraqat salatyn patrondarmen atý múmkindigi bar uńǵysyz atys qarýyn, gazdy qarýdy, qysqa uńǵyly tegis uńǵyly atys qarýyn, sol siiaqty onyń patrondaryn zańsyz iemdený, berý, ótkizý, saqtaý, tasymaldaý nemese alyp júrý aiyby qarastyrylǵan.
Shárip "Inkar" JShS-ǵa basqa jetkizýshilerge qaraǵanda birrettik qorǵanysh kiimderi úshin joǵary baǵa usynǵanyna jáne ony ýaqytynda jetkizbeý qaýpi joǵary bolǵanyna qaramastan zańsyz túrde qoldaý kórsetti dep aiyptalǵan.
JShS jetkizý boiynsha mindettemelerin oryndamaǵan jáne 30 sáýirde "SQ-Farmatsiia" kompaniiamen kelisimshartty birjaqty buzǵan. Densaýlyq saqtaý ministrligi ókili osy kezeńde eki myńǵa jýyq meditsina qyzmetkeri COVID-19 juqtyrǵanyn aitty.
Aldyn ala tyńdaýda Sháriptiń advokattary ony qamaýdan bosatý nemese úi qamaýyna alý týraly ótinish berdi, biraq sot ótinishti qabyldamaǵan.
Shárip 2006 jyldyń qazanynan 2008-diń sáýirine deiin Ońtústik Qazaqstan oblysynda (qazirgi Túrkistan oblysy) turyp, OQO Densaýlyq saqtaý departamentinde jumys istedi.
"Osy kezeńde Shárip Shymkenttiń qarý-jaraq dúkeninen MR-461 "Qaraýyl" markaly uńǵysyz atys qarýyn, 18h45 kalibrli tapanshany, sondai-aq tapanshaǵa patrondar satyp aldy.
"Jekelegen qarý túrleriniń ainalymyn memlekettik baqylaý týraly" zańnyń 6-babyna sáikes, uńǵysyz atys qarýy qyzmettik qarýǵa jatady. IIO-dan qarýdy saqtaýǵa jáne alyp júrýge ruqsat alǵan zańdy jáne jeke tulǵalarǵa azamattyq jáne qyzmettik qarý men onyń patrondaryn saqtaýǵa ruqsat etiledi.
Atys qarýyn saqtaýǵa jáne alyp júrýge ruqsaty joq Sharip 2007 jyldyń tamyzynan 2020 jyldyń 6 tamyzyna deiin ózin-ózi qorǵaýǵa arnalǵan tapanshany zańsyz saqtaǵan", - dedi memlekettik aiyptaýshy.
Onyń aitýynsha, qarý Shariptiń páterinen 2020 jyldyń 6 tamyzynda tintý kezinde tabylǵan. Tapanshamen birge paidalaný kitaby, tórt travmatikalyq patron jáne atys patronynyń oqsaýyty boldy.
"Osylaisha, Shárip jaralaityn patrondary bar atys qarýyn zańsyz saqtai otyryp, Qylmystyq kodekstiń 287-baby 2-bóliginde kózdelgen qylmystyq quqyqbuzýshylyq jasady, - dedi prokýror aiyptaý aktisinde.
