Belgili ýkrainalyq dáriger jáne telejúrgizýshi Evgenii Komarovskii antivakserler pikirine emotsionaldy túrde jaýap berip, vaktsinatsiiany qoldaityndarǵa úndeý jasady, - dep habarlaidy Tengrinews.kz.
"Jaqynda vaktsinanyń ekinshi dozasyn alǵanyma (koronavirýsqa qarsy. - eskert.) bir kún bolady jáne sonymen bastaldy. Eger sizdi qorlap, kemsitip, sizge búkil kúnáni japqanyn qalasańyz, onda kez kelgen vaktsina týraly jaǵymdy pikirińizdi ashyq jazsańyz jetkilikti. Osyǵan súiene otyryp, sizdermen (antivakserler. - eskert.) bailanyspaýdy uiǵarǵanmyn. Sondyqtan vaktsinatsiia jáne koronavirýs týraly Komarovskiidiń jýrnalynda ǵana jazamyn. Sebebi, onda dórekilik kórsetetin adamdar joq ekenin bilemin (...) ", - dedi Komarovskii.
Dárigerdiń aitýynsha, ony "vaktsinatsiiany qoldap, ony saldyrǵan adamdardyń kópshilik arasynda ol týraly belsendi aitpaityny" qynjyltady. Sebebi, kez kelgen qoǵamdyq belsendilik sońy qiianat, óreskel qorlaýǵa ákeledi jáne oǵan qarsy turý óte qiyn.
"Meni vaktsinatsiiany qoldaityn pikirler sany óte az ekeni tańǵaldyrady. Tipti jyldar boiy iriktelgen oqyrmandarymnyń arasynda da. Sebebi oǵan eshkim aralasqysy kelmeidi. Pikirlerdi oqyǵan adam men týraly jaman oilaidy jáne "bilikke satylǵanymen qoimai búkil halyqtyń is-áreketin sógedi" degen pikir qalyptasady. Biraq balalar, sizder únsizdik, dórekilik, zulymdyqqa qarsy bolmasańyz, kúmáni barlar zulym topqa ótip ketetinin bilesiz be? Osy týraly oilanyp kórińiz", - dedi Komarovskii.
Dáriger balalardyń densaýlyǵyn saqtaý men qorǵaýǵa 40 jyl jumsaǵanyn jáne bul onyń jalǵyz maqsaty ekenin aitty.
Komarovskii AstraZeneca vaktsinasyn saldyrǵanyn atap ótti, óitkeni bul oǵan qol jetimdi alǵashqy vaktsina bolǵan.
