Senatorlar depýtattyq ókilettigi toqtaǵan áriptesterin qoshemetpen shyǵaryp saldy, dep habarlaidy Sputnik Qazaqstan.
Qazaqstan Prezidentiniń Jarlyǵymen 12 tamyzda Sergei Gromov, Birǵanym Áitimova, Asqar Beisenbaev, Georgii Kim, Dýlat Qusdáýletov, Rashid Túsipbekovtiń depýtattyq ókilettigi toqtatylǵan edi. Búgin Senattyń jalpy otyrysynda depýtattar burynǵy áriptesterine alǵys aityp, qoshemetpen shyǵaryp saldy.
Osydan keiin Birǵanym Áitimova minberge shyǵyp, áriptesterine jyly lebizin bildirdi.
"Qurmetti Dariǵa Nursultanqyzy, qurmetti áriptester! Bizdiń izimizdi basyp kele jatqan áriptester! Sizder bolmasańyzdar, biz áli qalar edik. Sizderdi quttyqtaimyz", - dedi burynǵy senator.
Áitimovanyń bul sózi depýtattardy dý kúldirdi. Keiin Dariǵa Nazarbaevany joǵary palatanyń tóraǵasy bolyp sailanýymen quttyqtap, gúl shoǵyn syilady.
"Bárińizdiń aldaryńyzǵa osyndai kez keledi. Búgin bolmasa, erteń. Erteń bolmasa, bes-alty jyldan keiin. Biraq, eń bastysy, bárińizge osyndai syilastyq kórsetkenderińiz úshin basymdy iemin", - dedi ol.
Áitimova osy jyldar ishinde ózine senim artqan Elbasyǵa rizashylyǵyn bildirdi.
"Meniń ómirdegi eń basty ustanymym – adal jumys istep, elge, halyqqa tek paida ákelý, eshqandai jamandyq jasamaý boldy. Osy printsippen áli kúnge deiin jumys istep kelemin. Sondyqtan maǵan úlken senim bildirgeni úshin Elbasymyzǵa myń da bir raqmet... Ol kisige raqmetten basqa aitar sózim joq. Densaýlyq tileimin, ári qarai elimizdiń aqylshysy bolyp otyrýyna tilektespin", - dedi burynǵy depýtat.
Sondai-aq, Áitimova Qazaqstannyń qazirgi Prezidenti Qasym-Jomart Toqaevqa da alǵysyn aitty.
Birǵanym Saryqyzy Áitimova 1953 jylǵy 26 aqpanda týǵan.
A.S. Pýshkin atyndaǵy Oral pedagogika institýtyn, ál-Farabi atyndaǵy Qazaq ulttyq ýniversitetin bitirgen. Mamandyǵy boiynsha aǵylshyn tiliniń muǵalimi, zańger.
Tótenshe jáne ókiletti elshi diplomatiialyq rangy bar.
Ár jyldary Qazaqstannyń Izraildegi, Italiiadaǵy elshisi, premer-ministrdiń orynbasary, bilim jáne ǵylym ministri, Qazaqstannyń BUU janyndaǵy turaqty ókili qyzmetterin atqardy.
2013 jyldyń 26 tamyzynan 2019 jyldyń 12 tamyzyna deiin senat depýtaty boldy.
"Qurmet", "Parasat" jáne II dárejeli "Dostyq" ordenderimen marapattalǵan.
Turmysta, bir ul, bir qyzy bar.
