Foto: kazatu.edu.kz
Májilis depýtaty Tańsáýle Serikov Ónerkásip jáne qurylys ministrligine jańa baspana salynbaǵan aýyldarda turatyn múgedekterge eski úilerdi memleket qoldaýymen satyp alýǵa múmkindik berýdi usyndy, dep habarlaidy QazAqparat agenttigi.
«Qazaqstanda 720 myńnan astam múgedektigi bara adam tirkelgen. Onyń 310 myńy aýyldarda turady. Ózderińiz de jaqsy túsinip otyrsyzdar, I toptaǵy múgedekterdiń járdemaqysy – 89 128 teńge.
Ministrlikterdiń ókilderi, «Otbasy bank» ókili múgedektigi bar adamdardyń baspana alýyna, baspana jaldaýyna respýblikalyq, oblystyq mańyzy bar qalalarda, monoqalalarda jaǵdai jasalatynyn aityp otyr. Al aýyldardaǵy, aýdan ortalyqtaryndaǵy múgedektigi bar adamdar ne isteýi kerek? Aýyldarda úi salynbai jatqanyna 30 jyl boldy. Jái jer úiler bar. Sol jer úilerdi satyp alýǵa múmkindik bola ma? Ákimdiktiń quzyretine jatatyndai etsek bola ma? Biz siyrǵa qora salýǵa sýbsidiia berip jatqanda, múgedekter siyrdyń qataryna da jaramai qaldy ma?», – dep surady depýtat.
Ónerkásip jáne qurylys vitse-ministri Timýr Qaraǵoishin memleket biýdjeti aýyldaǵy eski úidi satyp alýǵa jumsalmaitynyn aitty.
«Aýyl men aýdanda turatyn I jáne II toptaǵy múgedekterge birinshi naryqtaǵy jańa úiden baspana satyp alýǵa ruqsat beremiz. Al qurylys salynbasa, memlekettik qordan alýǵa ruqsat beremiz. Bul aýdan ákimderine, oblys ákimderine de bailanysty. Keibir aýdan ákimderi qospáterli úiler saldy. Ministrlik oǵan qarsylyq qylǵan joq. Biraq biz aityp otyrmyz. Eski úilerdi satyp alýǵa memlekettiń qarjysyn jumsamaimyz. Biýdjetten oǵan qarjy jumsamaimyz. Ákimder, aýdan ákimderi bar, memleket qorynan jańa úiler salyp bersin.
I jáne II sanattaǵy múgedekter eshqashan nesie ala almaidy. Ony bárimiz bilemiz. Múgedek asyrap otyrǵan otbasylar nesie ala alady. Naqty sandy aitaiyn, 70 myń adam 2 paiyzdyq nesie ala alady. Qalǵandary memlekettik qordan alý kerek. Biz túgendeýdi bastadyq. Inventarizatsiia kezinde eshkim sottaspaidy da. Qazir atynda úii bar múgedekter kezekten shyǵarylyp jatyr. Birneshe úi alǵan adamdar bar. Osyndai sebeppen baspana kezeginen kópbalaly otbasylar kóp shyǵarylyp jatyr. Mine, osylai kezekti azaitamyz. Kezekti mindetti túrde azaitamyz», – dedi Timýr Qaraǵoishin.
