Biznes bastaý ońai emes. Kóp adam júreksinedi. Desek te, basqalarǵa qaraǵanda otbasylyq biznestiń tabysty bolatyny shetelderde áldeqashan dáleldengen. Bútin bir otbasy músheleriniń bárin jumyspen qamtyp, tabys tabýyna múmkindik beretin kásiptiń bul túri oblysymyzda da órken jaiyp keledi.
Sairamdyq jeke kásipker Álimjan Irismetov biyl bankten 4 mln. teńge nesie alyp, óz aldyna bir kásip bastaýdy maqsat etipti. Qazir qorasyndaǵy maly 15 siyrmen tolyǵa túsken. Biznes salasyn qalai órkendetý kerektigi týraly arnaiy oqý kýrstaryna qatysyp, óziniń bilimin jetildirip júrgen jaiy da bar.
Kásipker siyr sútin «FýdMaster» kompaniiasyna ótkizedi eken. Odan artylǵanyn jubaiy qaimaq, qurt jáne irimshik jasap, bazarǵa shyǵarady. Sairam aýdanynda otbasylyq kásipti násip etip otyrǵan osyndai otbasylardyń kóp ekeni bizdi qýantady.
Sala mamandary mal sharýashylyǵynda biylǵy 9 aida 28,3 mlrd. teńgeniń ónimi óndirilgenin aitady. Jalpy, qazirgi tańda aýdanda 205190 iri qara mal, 71689 jylqy, 98809 qoi men eshki bar. Mal bordaqylaityn oryndardyń da qatary kún sanap artyp keledi.
Máselen, Mankent aýyl okrýginde ornalasqan «Nurym Grýpp» JShS-niń mal bordaqylaý alańyn óńirdegi eń iri jobalardyń biri deýge bolady. Onyń quny 3,5 mlrd. teńgeni quraidy. Nysannyń qurylys jumystary biyl sáýir aiynda bastalǵan bolatyn. Qazir aiaqtalýǵa jaqyn.
Ázirge munda Shyǵys Qazaqstan oblysynan ákelingen 1200 iri qara mal bar. Sharýashylyq meńgerýshisi Kenjaly Aitýov jyl sońyna deiin olardyń qataryn 10 myńǵa jetkizemiz deidi.
Aita keteiik, buiyrtsa, munda jem shyǵaratyn tseh pen mal soiý alańy da iske qosylmaq.
"Ońtústik Qazaqstan"
