"Siriiaǵa ketýdi armandaǵan" jigit áielin qan-josa qylyp pyshaqtap, óltirip ketti (Video)

Almaty oblysynda 33 jastaǵy Baqtybai Polatbai esimdi azamat ajyrasqan áielin qan-josa qylyp pyshaqtap, óltirip ketti. Qandy oqiǵa Talǵar aýdanyna qarasty Dáýlet aýylynda bolǵan. Sýyq qarý ustap, tapa-tal túste beiqam otbasynyń oiranyn shyǵarǵan "kúieý bala" áý bastan Siriiaǵa ketýdi maqsat etken kórinedi. Úsh kún boiy iz kesken politseiler kúdiktini ázirge tapqan joq. Al jaýyzdyqtyń qurbany bolǵan Arailym Dúisekovanyń denesin týystary búgin jer qoinyna tapsyrdy.   

Dúisekovter otbasy orny tolmas qazadan keiin qaiǵydan qan jutyp, eseńgirep otyr. Aýyr kúrsinip, tilge áreń kelgen anasy qyzynyń sońǵy alty jyly qorlyq-zorlyqpen ótti deidi. Kúieýi qansha uryp soqsa da, eki balamdy jetim qaldyrmaiyn dep shydap kelgen. Anasynyń aitýynsha, kúieý balasy Arailymdy "Seni qurbandyqqa shalyp, Siriiaǵa ketemin" dep qorqytqan.  

ÁLIMA AHMETOVA, Marqumnyń anasy:
- Ylǵi jaman kinolardy kóretin. Sosyn Arailymdy óltirip, Siriiaǵa ketemin dep armandap júrgen. Meni eshkim tappaidy, qaityp kelip qyramyn dedi. Qyzyma erteń hidjab kigizip qoiamyn, seni qurbandyqqa shalam dep armandaityn. Armanyna jetti.   Týystary Baqtybai Polatbai qasaqana áreketti júzege asýry úshin josparly túrde, daiyndaldy deidi. Ol jeksenbi kúni tús kezinde beiqam otyrǵan úige saý etip jetip kelgen.  

MANAS QAIYRTAIULY, Tilshi: 
-  Esik qaqqanda aldymen úiden shyqqan Arailymnyń ákesine 2-3 ret pyshaq nuqyp, kózine gaz ballonyn shashyp jiberedi. Ol kisi kózin asha almai otyryp qalǵanda, osy jerge júgirip kelip, myna terezeni kúldir etkizip shaǵady.  - Sodan keiin osy tereze arqyly Baqtybai ishke kirgen. Óziniń kishkentai qyzyn terezeden shyǵaryp, qashpaq bolǵan Arailymnyń shashynan ustap qalyp, birneshe ret pyshaq suqqan.   

ÁLIMA AHMETOVA, Marqumnyń anasy: 
- Qashqan kezde artynan baryp pyshaqtap tastady. Birazdan keiin meni óltirem dep edi, sińilim óltirmeshi, aqylyń bar ǵoi dep aldady.  

4 litrge jýyq qan joǵaltqan 31 jastaǵy kelinshek Ótegen batyr kentindegi aýrýhanaǵa jetpei jol ústinde jan tapsyrady. Buǵan deiin otbasy birneshe ret politsiiaǵa shaǵymdanǵan. Biraq Almatyda arnaiy jasaqta qyzmet etetin aǵasy kómektesip, bosatyp jiberedi deidi. Marqumnyń et jaqyndary qaskói "kúieý balany" quzyrly organdar ustap, ádil jazaǵa tartýyn suraidy.  

ÁDILHAN AHMETOV, Marqumnyń ákesi: 
- Biz qamatamyz. Birneshe márte. Sol járdem berip shyǵaryp jiberedi ony. Politseilerge biz shaǵymdandyq. Olar keldi. Ázirge nátije joq. Úsh kún boldy. Izdep jatyrmyz dep aitady. Ázirge nátije kórip otyrǵanymyz joq.  

Al Arailym Dúisekovanyń artynda qalǵan Rasýl men Káýsar atty qos birdei búldirshin analary qashan keler eken dep alańsyz kútip júr. Qazaǵa jinalǵan qaýym bolsa, marqumnyń arýlanǵan denesin aqtyq saparǵa alyp ketip bara jatty...  Bekzat esimdi jergilikti politsiia inspektory bul oqiǵa boiynsha qylmystyq is qozǵalǵanyn aitty. Biraq Siriiaǵa ketýdi kózdegen jigitti izdestirý jumystary respýblika emes, ázirge oblys kóleminde ǵana júrgizilip jatyr eken.